नेपाल चलचित्र कलाकार संघले बुधबार आफ्नो दशौं बार्षिक साधारण सभा कार्यक्रमको अवसरमा तीन चलचित्र पत्रकारलाई सम्मान गरेको छ । नेपाली चलचित्रको विकास र चलचित्र कलाकार संघलाई प्रत्यक्ष तथा अप्रत्यक्ष रूपमा सहयोग गर्दै आएको भन्दै शान्ति प्रिय, अनन्त वाग्ले र फुलमान वललाई संघले सम्मान गरेको हो ।
लामो समय देखि पत्रकारितामा संलग्न सम्मानित तीन पत्रकारहरूमा शान्ति प्रिय हाल फिल्मीखबर साप्ताहिकका सम्पादक हुन् भने अनन्त वाग्ले अन्नपूर्ण पोष्टसँग आवद्व छन् । यसैगरी फुलमान वल कान्तिपुर दैनिकसँग आवद्व छन् । सम्मानित भए पछि फिल्मीखबरसँग कुरा गर्दै शान्ति प्रियले यो सम्मानले आफूलाई थप काम गर्न उर्जा प्रदान गरेको बताए । साथै उनले आगामी दिनमा पनि नेपाली चलचित्रको विकासका लागि आफ्नो तर्फबाट सक्दो योगदान पुर्याउने बताए ।
कार्यक्रममा सम्मान लिन दुई पत्रकार शान्ति प्रिय र फुलमान वल उपस्थित भए भने अनन्त वाग्ले कार्यव्यस्तताले गर्दा उपस्थित हुन सकेनन् । आफू उपस्थित हुन नसके पनि वाग्लेले संघलाई धन्यवाद भने दिए । यता फुलमान वल पनि सम्मानित भएपछि यस्ता सम्मानले काममा उर्जा थप्ने बताए । फिल्मीखबर डटकम सम्मानित तीनै पत्रकारलाई हार्दिक बधाई दिन चाहन्छ ।
