फार मुभिजको व्यानरमा निर्माण भएको चलचित्र 'अन्दाज' को भोली फुलपातीको दिन प्रिमियर गरिंदै छ । राजधानीको कुमारी हलमा बिहान साढे आठ बजे चलचित्रको प्रिमियर गरिने निर्माता छबि ओझाले फिल्मीखबरलाई जानकारी दिए ।
असोज १६ गते फुलपातीकै दिनबाट मोफसलका सिनेमा घरमा सार्वजनिक हुन लागेको चलचित्र 'अन्दाज' को प्रिमियरमा पत्रकार र आफ्ना नजिकका शुभचिन्तकलाई मात्र डाक्ने नायिका रेखा थापाको भनाई छन् । उनका अनुसार दशैंको बेला रिलिज हुन लागेको आफ्नो चलचित्रलाई शुभकामना दिने नजिकका शुभचिन्तकलाई मात्र प्रिमियरमा डाकिने छ । त्यसैले रेखाले उक्त चलचित्र प्रदर्शन कार्यक्रमलाई प्रिमियर नभनेर फ्यामिली शो भनेकी छिन् ।
दर्शकहरूका लागि प्रतिक्षारत चलचित्र 'अन्दाज' काठमाण्डौ उपत्यकामा भने आगामी शुक्रबार अर्थात असोज २० गतेबाट लाग्ने छ । छबिराज ओझा, अशोक शर्मा र उज्वल घिमिरेको संयुक्त लगानीमा निर्माण भएको सो चलचित्रमा रेखा थापा, जीवन लुईटेल र सबिन श्रेष्ठको मुख्य भुमिका रहेको छ । उज्वल घिमिरेले निर्देशन गरेको सो चलचित्रमा बसन्त सापकोटाको संगीत, कविराज गहतराज तथा शंकर बीसीको नृत्य, विष्णु कल्पितको छायांकन तथा राजेन्द्र खड्गीको द्वन्द्वनिर्देशन रहेको छ ।
