लामो समयको पर्खाई पछि अन्तत: आज शनिबार अष्ट्रेलियाको मेलबर्नमा चलचित्र 'म तिम्रो भईसकें' रिलिज हुँदैछ । अष्ट्रेलियाको समय अनुसार बिहान १:३० बजे मेलबर्नको Astor Theatre मा सो चलचित्र स्क्रिनिङ गरिंदै छ । नेपाली चलचित्रलाई अष्ट्रेलियामा रिलिज गर्दै आएको संस्था सोलाङचरले रिलिजको चाँजोपाँजो मिलाएको हो ।
दशैं अगाडी नै रिलिज गर्ने भनिएको भएपनि प्राबिधिक कारणले हुन नसकेपछि अहिले आएर मात्र रिलिज हुन लागेको आयोजकको भनाई छ । भव्य समारोह बिच 'म तिम्रो भईसकें' को स्क्रिनिङ गर्न लागिएको सो कार्यक्रममा नायक जीवन लुईटेलले सहभागिता जनाउँदै छन् । उनी करिब एक महिना अगाडी नै अष्ट्रेलिया पुगेका थिए । अष्ट्रेलियाबाट फिल्मीखबरसँग कुरा गदै जीवनले कार्यक्रम भव्य रूपमा सम्पन्न गर्नका लागि सम्पूर्ण तयारी पूरा भईसकेको जानकारी दिए ।
मेलबर्न पछि यो चलचित्र अष्ट्रेलियाका अन्य स्थानमा पनि रिलिज गरिने भएको छ । नायक जीवन भने यहि साता भित्रमा नेपाल फर्कने छन् । जीवन यस अघि पनि आफ्नै चलचित्र 'नाइ नभन्नु ल' लिएर अष्ट्रेलिया पुगेका थिए । नेपाली चलचित्रलाई बिश्व बजारमा पुर्याउने हेतुले आफू स्वयं नै यसरी चलचित्र लिएर जाने गरेको जीवनको भनाई छ ।
काठमाण्डौ उपत्यका बाहिरका सिनेमा घरमा रिलिज भईरहेको चलचित्र 'म तिम्रो भईसकें' लाई बिकाश आचार्यले निर्देशन गरेका हुन् । बसन्त सापकोटाको संगीत रहेको सो चलचित्रमा जीवनका अलावा ऋचा सिंह ठकुरी, अयुब केसी, बिज्ञान सापकोटा लगायतले अभिनय गरेका छन् । चलचित्रलाई वन टाईम सिनेमा प्रालिले निर्माण गरेको हो ।
