एउटा दाजुको आफ्नी बहिनी प्रतिको माया अनि भाईटिकाको अधुरो सपनालाई मुख्य बिषय बनाएर निर्माण गरिएको पारिवारिक चलचित्र 'पर्खिराख है' लाई हेर्न अब धेरै समय पर्खनु पर्ने छैन । तिहार सकिएको करिब एक महिनामा नै यो चलचित्र सार्वजनिक हुनेछ ।
दिया फिल्मस् प्रोडक्शनको ब्यानरमा निर्माण गरिएको चलचित्र 'पर्खिराख है' आउँदो मंसिर १६ गते देशभरका सिनेमा घरमा लाग्नेछ । मुम्बईमा निर्देशन समबन्धि ज्ञान हासिल गरेर नेपाल आएका निर्देशक बाबुराम ढकालले पहिलो पटक निर्देशन गरेको यस चलचित्रबाट नायकको रूपमा दिल श्रेष्ठको जन्म हुँदैछ । चलचित्रको प्रस्तुतकर्ता समेत रहेका नवनायक दिलका अलावा यस चलचित्रमा मुकेश ढकाल, मेलिना मानन्धर र सञ्चिता लुईटेलको मुख्य अभिनय रहेको छ ।
बाबुराम ढकाल र अच्युत अधिकारीको संयुक्त लेखन रहेको सो चलचित्रमा सुरेश अधिकारिको संगीत तथा राजेश पायल राई, अञ्जु पन्त, उदित नारायण झा, सञ्जिवनी, मञ्जिरा र जावेद अलिको स्वर रहेको छ । हिमाल केसीको द्वन्द्व, कबिराज गहतराज, बसन्त श्रेष्ठ र शिव शर्माको कोरियोग्राफी, दिपक बज्राचार्यको सिनेमाटोग्राफी रहेको सो चलचित्रको सम्पादन बनिश शाहले गरेका हुन् ।
