अन्य स्थानहरुमा भाद्र १६ बाट प्रदर्शनमा आएको चलचित्र 'ब्रेक फेल' ले धरानमा बल्ल प्रदर्शनको पालो पाएको छ । चलचित्र आइतबारबाट धरानको गणेश टाकिजमा प्रदर्शन भएको छ ।
धरानको दुवै हलमा क्यूब र्सवर जडान भएकोले डीसिएनले वितरण गरेको चलचित्र हतपत्त रिलिज हुँदैन । डीसिएनबाट आफ्नो चलचित्र रिलिज गराएका निर्माता निर्देशकहरु आफ्नै पहलमा डेट पर्खेर धरानमा चलचित्र रिलिज गरेको पाइन्छ । यसै क्रममा ब्रेक फेलका निर्माता एवं निर्देशक शंकर घिमिरेले पनि पालो कुरेर भएपनी आफ्नो चलचित्रलाई धराने दर्शक माझ प्रदर्शनमा ल्याएका छन् ।
अन्य स्टेसनमा सामान्य व्यापार गरेको चलचित्रलाई धरानका दर्शकले रुचाउने दाबी घिमिरेको छ । चलचित्रको गीतसंगीत, लोकेसन र कथाबस्तुलाई चलचित्र हेरिसकेकाले मन पराइसकेका छन् । नेपाल पछि चलचित्रको क्यानाडा, बेलायत, अमेरिका लगायतका देशहरुमा समेत प्रदर्शन हुने छ । वर्ल्ड वाइड मुभिजको ब्यानरमा नायिका ऋचा घिमिरेको प्रस्तुति रहेको चलचित्र ब्रेकफेल पूर्ण रूपमा हाँस्यप्रधान बनेको छ ।
यस चलचित्रमा मुख्य तीन पात्र ऋचा घिमिरे, निरज बराल र बिमलेश अधिकारी ठग पात्रको भुमिकामा प्रस्तुत भएका छन् । यसका साथै यस चलचित्रमा राजेश हमाल, सुवास थापा, ममता प्रधान, शिवहरी कार्कीको साथमा नवप्रस्तुतीको रूपमा चिरन बिमली तथा मदन महतले अभिनय गरेका छन् । चलचित्रमा शिवहरी कार्की, मनोजकुमार घिमिरे तथा प्रदीप सिंहको पनि लगानी रहेको छ ।
