नेपाली चलचित्र भनि प्रचारप्रसार गरि केहि साता अगाडी नेपालबाट नै प्रदर्शनमा आएको चलचित्र 'आचार्य' अहिले दुई ढुंगा बिचको तरूल जस्तै भएको छ । अर्थात यो चलचित्र भारतिय हो या नेपाली भन्ने प्रश्नमा नै अल्झिएको छ ।
भारतमा चलेको १३ औं मुम्बई फिल्म फेस्टिभलमा गत शुक्रबार 'आचार्य' ले 'इन्डियन फ्रेम' नामको समुहमा भाग लिएर प्रदर्शित भएपछि यो चलचित्र नेपाली कि हिन्दी भन्ने दोधारमा परेको हो । भारतिय चलचित्रको रूपमा 'आचार्य' ले फेस्टिभलमा सहभागिता जनाए पनि निर्माण युनिट भने यस चलचित्रलाई नेपाली नै भन्छ । चलचित्रका नायक सत्यराज आचार्यले सम्पूर्ण कलाकार, भाषा, स्थान मात्र हैन जस्को नाममा चलचित्र बनाईयो उही व्यक्ति नै नेपाली भएकाले सो चलचित्र नेपाली भएको दाबि गर्छन् ।
भजनशिरोमणी भक्तराज आचार्यको जीवनकथामा आधारित रहेर निर्माण गरिएको चलचित्र 'आचार्य' नेपाली भाषामा छ तर निर्माण कम्पनी भने सिक्किमको सिल्क रूट व्यानर हो । 'सायद निर्माण कम्पनी भारतको भएकाले पनि हुनसक्छ यसलाई भारतिय चलचित्रको रूपमा फेस्टिभलमा प्रस्तुत गरिएको', निर्देशक प्रशान्त रसाईली थप्छन्, 'फेस्टिभलमा भारतिय चलचित्र भनिए पनि यो नेपाली चलचित्र नै हो ।' आफू भारतिय नागरिक भएकाले पनि चलचित्रलाई 'इन्डियन फ्रेम' मा समावेश गरिएको हुनसक्ने निर्देशक रसाईलीको भनाई छ ।
यसरी भारतिय र नेपाली चलचित्रको दोसाँधमा परेको 'आचार्य' को नेपालको प्रतिनिधित्व गरेर ओस्कारमा जाने सम्भावना न्यून देखिएको छ । आचार्य यस बर्षको ओस्कारमा भाग लिन नसके पनि अर्को बर्ष भने नेपालकै तर्फबाट सहभागिता गराउने नायक सत्यराजको भनाई छ । यस बर्ष ओस्कार आयोजकले फेस्टिभलमा भाग लिएका चलचित्रहरूको स् सूची सार्वजनिक गरिसकेकाले 'आचार्य' को यस बर्ष ओस्कार जाने सपना टुटेको हो ।
