पारिवारिक प्रेमकथामा आधारित रहेर निर्माण गरिएको चलचित्र 'मेरो माया तिमीलाई' आगामी मंसिर ८ गते राजधानी बाहिरका हलबाट सार्वजनिक हुने भएको छ । सेन्सर बोर्डले युनिभर्सल सर्टिफिकेट दिएको सो चलचित्र राजधानीमा भने मंसिर ९ गते लाग्ने छ ।
डिक खड्काको प्रस्तुतीमा योगेश घिमिरेले निर्देशन गरेको सो चलचित्रमा नवप्रस्तुतीको रूपमा अनुप बिक्रम शाहले अभिनय गरेका छन् । यसैगरी सो चलचित्रमा शुशिल क्षेत्री, जेशिका खड्का, रबिन्द्र खड्का, बालदिप राई लगायतले अभिनय गरेका छन् । प्रसिद्वि सिनेमेकर्सको व्यानरमा निर्माण भएको सो चलचित्रमा सूर्य लामा र मेघराज पौडेलको पनि लगानी रहेको छ ।
प्रकाश बस्नेत, मनोज सिं, सूर्य कार्की, कोशिश क्षेत्री र दिपक ओलीको संगीत रहेको चलचित्रमा सूर्य लामाको कथा, जिबी रूवालीको पटकथा तथा संवाद, हिमाल केसीको द्वन्द र गणेश श्रेष्ठको छायाँकन रहेको छ । निर्माता तथा छायाँकार डिक खड्काले यस अघि निर्माण गरेको चलचित्र 'मजबुर' पनि प्रदर्शनको क्रममा रहेको छ । सो चलचित्रलाई दिपक श्रेष्ठले निर्देशन गरेका हुन् । निर्माता खड्का छायाँकार समेत हुन । उनले दर्जनौं सिनेमाको छायाँकन गरिसकेका छन् ।
