छोरी पाए पछि सार्वजनिक कार्यक्रममा नदेखिएकी नायिका मेलिना मानन्धरलाई दर्शकले पर्दामा देख्न नपाएको पनि धेरै नै भयो । करिब एघार महिना अगाडी छोरीलाई जन्म दिएकी यि नायिकालाई अब छिट्टै नै पर्दामा देख्न पाईने छ ।
नायिका मेलिना मात्र हैन अर्की नायिका सञ्चिता लुईटेललाई पनि पर्दामा नदेखेको धेरै समय भैसकेको छ । नायक निखिल उप्रेतीसँग बिबाह गरेर मुम्बई गएपछि त उनी नेपाल फर्किन्नन् कि भन्ने अड्कल धेरैले काटेका थिए । तर यि नायिकाले नेपाल छोड्न सकिनन् र केहि महिना अगाडी नेपाल आईन् । नेपाल आएको केहि समयमा नै उनले छोरालाई जन्म दिईन् र अहिले सुत्केरी बनेर घरमा आराम गरिरहेकी छिन् ।
यि दुबै नायिका रजतपटमा चलेका अनुहार हुन् । दुबै नायिकाले थुप्रै राम्रा चलचित्रमा अभिनय गरेका छन् । तर एकसाथ अभिनय गरेको पहिलो चलचित्र भने 'पर्खि राख है' हो । जुन यहि मंसिर १६ गते सार्वजनिक हुँदैछ । मेलिनाको पछिल्लो समयको अभिनित अन्तिम चलचित्र पनि यहि नै हो । अहिले यि दुबै नायिका आफ्नो चलचित्रको रिभ्यूको प्रतिक्षामा छन् ।
दिल श्रेष्ठको निर्माणमा बाबुराम ढकालले निर्देशन गरेको सो चलचित्रमा मेलिनाका श्रीमान नायक मुकेश ढकालले पनि अभिनय गरेका छन् । तर उनी चलचित्रको पर्दामा नायिका सञ्चितासँग रोमान्स गरेका छन् भने मेलिनासँग दिल श्रेष्ठले अनस्क्रिन रोमान्स गरेका छन् ।
