सदाका दिनमा जस्तै आज शुक्रबारबाट तीन चलचित्र प्रदर्शनमा आएका छन् । दुई चलचित्र 'हाम्रो माया जुनी जुनीलाई' र 'म छु नि तिम्रो' उपत्यका बाहिरका सिनेमा घरमा लाग्दैछ भने 'इज्जतदार' उपत्यकाका हलमा मात्र लाग्दैछ ।
प्रदिप उदयले निर्माण गरेको चलचित्र 'हाम्रो माया जुनी जुनीलाई' मोफसलका ४१ सिनेमा घरमा लाग्दैछ । चलचित्रलाई ऋषि लामिछानेले निर्देशन गरेका हुन् । चलचित्रमा श्रीकृष्ण श्रेष्ठ, रेखा थापा तथा मुकेश ढकाल, नीता ढुङ्गाना, सुनिल थापा प्रमुख भूमिकामा छन् । काबिल फिल्मका लागि ब्रदर्श इन्टरटेन्मेन्टको प्रस्तुतीमा निर्माण भएको सो चलचित्रलाई नारायण कुमार पाण्डे ‘काबिल’, गंगा पौडेल र गोपाल पाण्डेले निर्माण गरेका हुन् ।
यता सोफिया सिने आर्ट्सको व्यानरमा निर्माण भएको चलचित्र 'म छु नि तिम्रो' पनि मोफसलका प्रमुख सिनेमा हलमा लाग्दैछ । रोज राणाको निर्माणमा मदन घिमिरेले निर्देशन गरेको सो चलचित्रमा रोज राणा, सौजन्य सुब्बा र आयुष रिजाल प्रमुख भुमिकामा छन् । चेतन सापकोटा र बसन्त सापकोटाको संगीत रहेको सो चलचित्रका गीतसंगीत अहिले निकै चर्चामा छन् । चलचित्रको प्रोमोशनमा लागि निर्माण युनिट पोखरा पुगेको छ ।
यता लामो समयको पर्खाई पछि चलचित्र 'इज्जतदार' राजधानीका अधिकांश हलमा लाग्दैछ । कृष्ण चापागाईंको निर्माण निर्देशनमा बनेको सो चलचित्रमा राजेश हमाल, विराज भट्ट, अर्जुन कार्की, अरुणिमा लम्साल, रन्जना शर्मा प्रमुख भुमिकामा छन् । यो चलचित्र भने राजधानी बाहिरका हलमा चलिसकेको छ ।
