व्यापारिक पृष्ठभूमि भए पनि सिनेमाप्रति सानैदेखि गहिरो रुचि राख्ने राजन श्रेष्ठले पहिलोपल्ट निर्माण गरेको सिनेमास्कोप फिल्म 'तोड' यहि मंसिर महिनाको २ गते राजधानीका सिनेमा घरमा चल्ने भएको छ ।
दुई बर्ष अगाडी राजधानी बाहिरका हलबाट राम्रो प्रतिक्रिया पाए पछि दंगिएका निर्माता तथा निर्देशक राजन श्रेष्ठले राजधानीका दर्शकले पनि आफ्नो चलचित्र रूचाउने दाबी गरे । चलचित्रमा बिराज भट्ट, रेखा थापा, सुमन सिंह जस्ता स्टार रहेकाले पनि चलचित्रको व्यापार राम्रो हुनेमा राजन ढुक्क छन् । उनी भन्छन्, 'मेरो चलचित्र हरेक पक्षबाट राम्रो छ त्यसैले पनि म त ढुक्क छु ।'
आफ्नी दिवंगत छोरीको स्मृतिमा राजनले निर्माण गरेको चलचित्र 'तोड' को कथा उनै छोरीको जीवनबाट प्रभावित छ । रश्मि फिल्मस् प्रालिको ब्यानरमा निर्माण गरिएको सो चलचित्र क्यू प्रणालीबाट प्रदर्शनमा आउन लागेको हो । महेश खड्काको संगीत, रोशन श्रेष्ठको द्वन्द्व, शिव ढकालको छायांकन रहेको सो चलचित्रमा उमा बेबीको पनि मुख्य भुमिका रहेको छ । चलचित्रमा दिनेश अधिकारीको करियोग्राफी रहेको छ ।
