प्रेम दिवसको अवसर पारेर सार्वजनिक हुन लागेको चलचित्र 'छबिलाल कञ्जुस छैन' का पोस्टरहरू सार्वजनिक गरिएको छ । निर्देशक ज्ञानेन्द्र देउजाले आफ्नो वालमा चलचित्रका ४ पोस्टरहरू पोस्ट गरेका छन् ।
सार्वजनिक गरिएका पोस्टरमा मुख्य पात्र अर्थात छबिलालको भुमिकामा रहेका निर शाहको तस्विर राखिएको छ भने राजेश हमाल, सुमन सिंह, सुमिना घिमिरे र बिष्णु सापकोटाको तस्विरलाई पनि प्रमुख प्राथमिकतामा राखिएको छ । निर्देशक देउजाले बिशेष गरि भ्यालेन्टाईन जोडीका लागि समर्पण गर्दै चलचित्रको रिलिज फाल्गुन महिनामा गर्ने योजना बनाएको बताए । भ्यालेन्टाईनका बेला चलचित्र रिलिज गर्न लागेकाले पनि होला उनले पोस्टरमा 'ह्याप्पी भ्यालेनटाईन डे' को सर्टफम उल्लेख गरेका छन् ।
तस्विर सार्वजनिक गरेका निर्देशक देउजाले अब बिस्तारै चलचित्रका गीतसंगित र तस्विरहरू सार्वजनिक गर्दै प्रचारप्रसारलाई तिब्रता दिने बताए । फिल्मीखबरसँग कुरा गर्दै देउजाले भने, 'अब केहि दिनमा प्रोमो र गीत सार्वजनिक गर्नेछु ।' भ्यालेनटाईन डे लक्षित गरेर चलचित्रमा एउटा भ्यालेनटाईन गीत समेत रहेको र सो गीत केहि दिनमा फिल्मीखबरबाट नै सार्वजनिक गर्ने निर्देशकको भनाई छ ।
साजन फिल्म्स प्रालिको प्रस्तुतीमा संजय कुटुले निर्माण गरेको पारिवारिक कमेडी चलचित्रमा राजेश हमाल, निर शाह, सुमन सिंह, सुमिना घिमिरे र बिष्णु सापकोटाको मुख्य अभिनय गरेको छ । यो चलचित्र सुमिना घिमिरेको पहिलो चलचित्र हो । रिलिजका हिसाबले दुलही पहिलो भए पनि उनले ब्रेक पाएको फिल्म भने यहि नै हो । चलचित्रमा मौनता श्रेष्ठको लेखन, महेश खड्काको संगीत, हिमाल केसीको द्वन्द, बसन्त श्रेष्ठको नृत्य र रामशरण उप्रेतीको छायाँकन रहेको छ ।
