बिहिबार दिनभरी जसो नै नायक जीवन लुईटेल नवनायिका स्वेता भट्टराईसँग व्यस्त भए । उनले स्वेतालाई यति धेरै खुसी दिए कि उनले सो खुसीको बयान पनि गरेर नसक्ने भईन् । जीवन पनि आफूले मन पराएको युवतीसँग रोमान्स गर्न पाउँदा निकै खुसी देखिन्थे ।
राजधानीको एक अन्धार कोठामा जब जीवनले स्वेतालाई लगे त्यसपछि त स्वेताको होस् नै उडेछ । उनले सोचिन् यो अन्धकार कोठामा कतै जीवनले मलाई जबर्जस्ती त गर्न लागेको छैन । निकै डराएकी स्वेता एक पटक त मज्जाले चिच्याईन् तर उनको डर मेटिन धेरै समय लागेन । स्वेतालाई डरको अनुभुती हुने बित्तिकै त्यो अन्धकार कोठामा झिलीमिली बत्ति बल्न थाल्यो । त्यसपछि स्वेताको डर पनि भाग्यो ।
बत्ति बल्न नपाउँदै कोठा संगीतमय हुन थाल्यो भने जीवन पनि ह्याप्पी बर्थ डे टु यु भन्दै स्वेताको नजिक पुगे र उनलाई गुलावको फुल दिँदै आफ्नो माया दर्शाए । वरीपरी बेलुन अनि आफ्नो शरिर भरी फुलैफुल भए पछि स्वेता निकै खुसी भईन् र जीवनलाई थ्यान्क्यू भन्दै अंगालो हालिन् र केहि बेर बर्थ डे म्युजिकमा जीवनसँग डान्स पनि गरिन् । जीवन पनि स्वेतालाई खुसी पारे पछि निकै हर्षित हुँदै भने, 'उनीलाई मैले सरप्राईज बर्थ डे गिफ्ट दिएको ।'
प्रस्तुत प्रसङ्ग राजधानीमा धमाधम छायाँकन भईरहेको मधुसुदन भट्टराई निर्देशित चलचित्र 'ब्ल्याक मेल' को हो । जहाँ नवनायिका स्वेता भट्टराईको बर्थ डे सिनको छायाँकन भईरहेको थियो । सस्पेन्स, थ्रिलर तथा एक्सनको साथमा त्रिकोणात्मक प्रेमकथामा आधारित रहेर निर्माण शुरू गरिएको सो चलचित्रलाई शरद अधिकारीले निर्माण गर्न लागेका हुन् । करिब ४० % छायाँकन सकिएको सो चलचित्रमा जीवन लुईटेल र स्वेता भट्टराईको साथमा सुमन सिंह, आरपी पन्त, दिनेश शर्मा, शैलजा पाण्डे, रश्मि भट्ट तथा राजन महतले अभिनय गरिरहेका छन् ।
