व्यापारिक पृष्ठभूमि भए पनि सिनेमाप्रति निकै रूचि राख्ने राजन श्रेष्ठले निर्माण निर्देशन गरेको चलचित्र 'तोड' आज शुक्रबारबाट राजधानीका एक दर्जन भन्दा बढि सिनेमा घरमा चलिरहेको छ । करिब दुई बर्ष अघि मोफसलमा प्रदर्शन भएको सो चलचित्र क्यू सिस्टम अर्न्तगतका हलमा लागेको हो ।
ब्लड क्यान्सरबाट निधन भएकी आफ्नी छोरी रश्मी श्रेष्ठको वास्तविक घटनालाई पर्दामा उतारेर राजनले चलचित्र निर्माण गरेका हुन् । कथामा मात्र हैन प्राबिधिक रूपमा समेत आफ्नो चलचित्र सबल रहेको बताउने राजनको सो चलचित्रमा बिराज भट्ट, रेखा थापा, सुमन सिंह, उमा बेबी र बालकालाकर स्नेहा शर्माको मुख्य अभिनय रहेको छ ।
आफ्नै परिवारको घटना भएको र सो घटनालाई आफैले मात्र बुझ्न सक्ने भएकाले चलचित्रको निर्देशन समेत आफैले गरेको बताउने राजनले हरेक दर्शकलाई 'तोड' ले भावुक बनाउने बताए । महेश खड्काको संगीत, राजेन्द्र थापा, दयाराम पाण्डे र डा कृष्णहरी बरालका शब्द साथै राजेश पाएल राई, अञ्जु पन्त, अञ्जना गुरुंग, दिपक लिम्बु, पुष्पा पौडेल लगाएतका गायक-गायिकाहरुको आवाज रहेको चलचित्र तोडका प्राबिधिक निर्देशक सबिर श्रेष्ठ हुन् ।
रोशन श्रेष्ठको द्वन्द र शिव ढकालको छायांकन रहेको सो चलचित्रका गीतमा दिनेश अधिकारीको करियोग्राफी रहेको छ । चलचित्रमा रेखा र बिराज अभिनित 'गरम गरम...' बोलको गीत अहिले निकै चर्चामा पनि छ । अब रेखा र बिराजले दर्शकलाई एकै पर्दामा गर्माउने धेरै चलचित्र नरहेको समेत बुझिएको छ ।
