चलचित्रको मुहुर्त गर्ने स्टाईल सबैका आ-आफ्नै हुन्छ । कोही नरिवल मात्र फुटाएर मुहुर्त गर्छन् त कोही मन्दिरमा पूजा गरेर अनि कोही बेलुन तथा परेवा उडाएर । यस्तै बिहिबार पनि एक चलचित्रको नयाँ किसिमले मुहुर्त गरियो ।
रामजी लामिछानेले निर्देशन गर्न लागेको चलचित्र 'ॐ' को बिहिबार राजधानीमा होम गरेर मुहुर्त गरियो । चलचित्रको नाम नै धार्मिक रहेको र ज्योतिषले पनि होम गरेर मुहुर्त गर्दा राम्रो हुने बताए पछि चलचित्र निर्माण युनिटको उपस्थितीमा रामजीले होम गरेर मुहुर्त गरेको बताए । भगवान प्रति आस्था राख्दै चलचित्र सफल हुने बिश्वासका साथ यसरी होम गरिएको निर्देशकको भनाई छ ।
स्र्टाईलिस एक्सन प्रधान चलचित्रको रूपमा निर्माण गरिन लागिएको सो चलचित्रमा शिर्ष भुमिकामा नायक सुमन सिंह देखिंदै छन् भने उनलाई नायिका झरना थापाले साथ दिनेछिन् । यसैगरी यसै चलचित्रबाट नयाँ अनुहारको रूपमा दीक्षा कुवँरले अभिनय गर्दैछिन् । साथै यस चलचित्रमा धिरेन शाक्य, विजय देउजा, शुसिल पोखरेल लगायतले अभिनय गर्दैछन् ।
एसपी मुभि मेकर्स प्रालिको ब्यानरमा सुरज प्रधान, करण श्रेष्ठ, भूपाल कार्की र कृष्णी कार्कीले संयूक्त निर्माण गर्न लागेको सो चलचित्रको छायाँकन मंसिरको दोस्रो साताबाट गरिने भएको छ । चलचित्रमा दिनेश सुनामको संगीत, कमल दाहालको कथा, रोशन श्रेष्ठको द्वन्द , एलिस कार्कीको व्याकग्राउण्ड म्युजिक, प्रमोद ढुंगानको गीत र दुर्गा पौडेलको छायाँकन रहने छ ।
