सुटिङको विजी सेडुलका कारण कहिले काहिं पर्सनल लाईफ समेत भन्न नपाएका अधिकाश कलाकारहरु अहिले फुर्सदमा छन् । पछिल्लो समय घट्दै गईरहेको फिल्मी बिजनेसको असर र सोही संगै संख्यात्मक रुपमा फिल्म निर्माणको क्रमले सुस्तता लिन थालेपछी उनीहरु फुर्सदिला देखिएका हुन ।
फुर्सदिला कलाकारको पहिलो पंक्तिमा हिरो आर्यन सिग्देल पर्दछन् । उनको भनाईलाई आधार मान्ने हो भने हरेक दिन उनी दुईवटा सम्म फिल्मका स्क्रिप्ट पढ्छन र बेलुकी भएपछी स्क्रिप्टमा चित्त नबुझेको भन्दै आएका प्रस्तावलाई रिजेक्ट गरिरहेको छन् । जस अनुरुप अन्तिम समयमा उनले स्टूपिड मनमा पनि नखेल्ने निर्णय गरेको खबर पनि बाहिर आईसकेको छ । अभिनय राम्रो गर्ने तर फिल्म नचल्ने पक्तिको हिरोहरुको लिष्ट उनी पहिलो नम्बरमा पर्दछन् ।
यस्तै आफू चलेपनि फिल्म नचल्ने हिरोको रुपमा राजबल्लभ कोईराला र सुमन सिंह पनि पर्छन् । तर उनीहरुले फिल्म पाईरहेका छन् । यति हो कि राजबल्लभ र सुमन राजेश हमाल स्टाईलमा जुन सुकै ब्यानरका फिल्म खेलिरहेका हुन्छन् र यो निरन्तरता अझै कायमै छ । राजबल्लभ त फुर्सदको समयमा बेलाबेलामा म्यूजिक भिडियोमा पनि खेलिरहेका हुन्छन् तर आएका प्रोजेक्टलाई हत्तपत्त रिजेक्ट नगर्ने राजबल्लभले आफ्नो लुक्स र क्यारेक्टलाई भने न्याय गरिरहेको देखिन्छ ।
राजबल्लभ पनि अहिले खाली नै छन् भन्दा हुन्छ किन कि 'ए फर अमेरिका' को छायाकंनको लागि उनी मंसिरको तेस्रो साता तिर अमेरिका जाने तयारीमा छन् र सोही फिल्मकै कारण अफर आएका दुई प्रोजेक्टलाई उनले रिजेक्ट गरिदिएका छन् । तर उनी भन्छन्, 'रिजेक्ट चाहि भनि नहालौ, ए फर अमेरिकाको कारण तत्काल अहिले अरु साथीहरुलाई टाईम दिन नभ्याएको हो ।' यस्तै सदावहार भएर अभिनय गरिरहने सोझो हिरो सुमनले गत साता मात्र दुई चलचित्रमा साईन गरेका छन् । उनले भर्खरै साईन गरेको चलचित्र ॐ छायाँकनको तयारीमा छ भने अर्को चलचित्र 'ग्याङस्टार' पनि अन्तिम तयारीमा जुटेको छ ।
यस्तै रेखा फिल्मसबाट डेब्यू गर्दा आयुष रिजालको ब्यस्तता जसरी बढेको थियो आजकाल रेखा क्याम्पमा अन्य हिरोहरुले स्थान पाएपछी आयुषको पनि ब्यस्तताको रफ्तारले सुस्त गति लिईरहेको छ । तर उनी खाली चाही छैनन् । कारण निर्देशक प्रदीप श्रेष्ठले जहिले सम्म प्रोजेक्ट पाईरहेका हुन्छन् तव सम्म आयुष उनको क्याम्पबाट बाहिरिने तत्काल कुनै आधार देखिएको छैन । जस अनुरुप लगातार प्रदीप श्रेष्ठको चारवटा फिल्ममा उनले अभिनय गरिसके । आयुष प्रदीप श्रेष्ठको 'तृष्णा' मा ब्यस्त भए लगत्तै प्रदीपकै नयाँ फिल्म 'मनको साथी' मा अनुबन्धीत भैसकेका छन् ।
यता नायक दिलिप रायमाझी भने अहिले व्यस्त देखिएका छन् । दिपक श्रेष्ठले निर्देशन गरिरहेको चलचित्र 'वाचा' मा अभिनय गरिरहेका दिलिप आफ्नो ड्रिम प्रोजेक्ट 'मिस यू' को रिलिजको तयारीमा पनि व्यस्त छन् । यता नायिका झरना थापा पनि व्यस्त नायिकाको सूचिमा नै छिन् । अहिले उनी आफ्नै होम प्रोडक्सनको चलचित्र फेसबुकमा अभिनय गरिरहेकी छिन् । यो चलचित्र लगत्तै उनी रामजी लामिछानेको चलचित्रमा व्यस्त हुनेछिन् ।
यसैगरी यो फुर्सदमा बेफुर्सद रहने कलाकारहरुमा राजेश हमाल सदाबहार भएर सधै ब्यस्त नै भैरहेका छन् । जुन निरन्तरता आउदा बर्षहरुमा पनि कायम हुनेमा कुनै शंका छैन । किनकि हमालले आजको मिति सम्म ८ वटा चलचित्रमा साईन गरिसकेको उनका सहयोगी चिराजीवी आचार्यको भनाई छ । यो सात महिनाको अवधिमा ६ वटा फिल्म रिलिजको लिष्ट रहेको ह्याण्डसम नायक जीवन लुईटेलको ब्यस्तताले पनि गति लिई रहेको छ । 'ब्ल्याकमेल' झमेलामा आर्यनसंग प्रोड्यरको लफडा परेपछी आर्यनको स्थानमा जीवन सो फिल्ममा अनुबन्धीत भएका छन् र सोही फिल्ममा उनी ब्यस्त छन । यस्तै ब्ल्याकमेल सकिए लगत्तै मेघा प्रोजेक्टका दुई फिल्मका लागि जीवनले साईन पनि गरिसेका छन् ।
यसैगरी विगत दशबर्षदेखि नम्बर वान भएर राज गरिरहेकी रेखा थापाको ब्यस्तता पनि अन्य नायिकाको तुलनामा अग्रपक्ति मै छ । उनी होम प्रोडक्सनको फिल्म रावण प्याकअप भए लगत्तै अहिले 'मेरो जिवन साथी' मा ब्यस्त छिन् भने लगत्तै लंका भन्ने चलचित्रमा उनी ब्यस्त हुने छिन् । रेखाको भनाईलाई आधार मान्ने हो भने आउदो बैशाखसम्म कुनै प्रोड्यूसरले प्रस्ताव गरेको खण्डमा यो बीचमा चाहेर पनि एग्रीमेन्ट गर्न नसक्ने बताउछिन् । रेखाले ६ वटा फिल्ममा साईन गरीसकेकी छिन् ।
यस्तै विस्तारै उदाउदै गरेकी हिरोईन निशा अधिकारीको ब्यस्तताले पनि अहिले पिकअप लिईरहेको छ । स्नो फ्लावर्समा अभिनय गरेको केही हप्ते विश्राम पछी उनी थ्री लभर्समा अभिनय गर्दैछन् । तर स्नो फ्लावर्समा उनीसंगै अभिनय गरेकी दिया मास्केले अभिनयबाट सन्यास लिएको खबर बाहिर आएकाले उनको ब्यस्ता अब ब्यक्तिगत लाईफमा मात्र सिमित हुने छ । यसैगरी दुई उप्रेती हिरोईन यूना र रेजिनाको हातमा पनि अहिले फिल्म छैन । चलचित्रमा मात्र हैन फिल्मी कार्यक्रममा समेत यि दुईको अनुहार आजकाल देखिएको छैन । रेजिनाले पछिल्लो पटक आफ्नै ब्यानरबाट बरदान निर्माण गरेपछी उनको सक्रियता घट्न थालेको हो ।
यसैगरी अमेरिकाबाट फर्किए लगत्तै विभिन्न चलचित्रमा अतिथि भूमिकामा अभिनय गरिरहेकी करिश्मा मानन्धरले उकेश दाहाल निर्देशित चलचित्र किन किन र गोपीकृष्ण मुभिजको मायाको बारीमा अभिनय गरिन तर ती दुई चलचित्रको छायाकंन सकिए लगत्तै करिश्मा समेत फुर्सदिली देखिएकी छिन् । यसैगरी यो मंसिरमा सुमन दाहालको चलचित्र यो मनको सुटिङ थाईल्याण्डमा हुने भन्दै मख्ख भएर बसेकी नन्दिता केसी पनि सो फिल्मको सुटिङ छ महिना पर धकेलिएपछी उनी अहिले फुर्सदिली छिन् ।
ब्रेक फेल रिलिज लगत्तै आउदा दिनमा होम प्रोडक्सन बाहेकका चलचित्रमा अभिनय नगर्ने भनी सन्यास लिएकी ऋचा घिमिरे पनि आजकाल पूर्ण रुपमा फुर्सदिली छिन् । केही साता अघि छोरीकी आमा बनेकी अरुणिमा लम्सालले गर्भवती भएका कारण करिब एक बर्ष देखि कुनै पनि चलचित्रमा काम गरेकी छैनन् । तर आफू तन्दुरुष्त हुने वित्तिकै अभिनयमा कमब्याक हुने उनको भनाई छ । यस्तै अर्की आमा हिरोईन मेलिना मानन्धर पनि छोरीका स्यहारमा लागेका कारणले फुर्सदमा बसेको लामो समय भैसक्यो तर किस किलर हिरोले परिचित उनको पति मुकेश ढकालको ब्यस्ता भने निकै चुलिएको छ आजकाल ।
यसैगरी प्राय खाली नरहने केकी अधिकारीको ब्यस्तता पनि अहिले चुलिरहेको छ । आजकाल उनी मायाको बारीमा भन्ने चलचित्रको प्रोमोशनमा खटिरहेकी छिन र ए फर अमेरिकाको लागि उनी अमेरिका जाने तयारीमा पनि छिन् । तर तत्काल उनी कुनै पनि प्रोजेक्टमा ब्यस्त छैनन् । यसैगरी मसानमा केकी संगै अभिनय गरेकी नीता ढुङ्गानाको ब्यस्ततामा पनि केही सुस्तता छाएको छ । नीताको तत्काल कुनै पनि फिल्म नरहेको बुझिएको छ । यसैगरी एक समय निकै चर्चा कमाएकी नम्रता श्रेष्ठको ब्यस्तातले अहिले शून्य गति लिएको छ । फिल्मी जमघटमा देखिरहने नम्रता मिस यू खॆलेको एक बर्ष हुन लाग्दा पनि कुनै पनि चलचित्रमा अनुबन्धीत भएकी छैनन ।
यि बाहेक पनि अन्य चलनचल्तीमा रहेका नायक नायिका फुर्सदिला भएका छन् । मंसिरको बढ्दो जाडोमा फुर्सदिला यि कलाकारहरू अहिले घरमा घाम ताप्न र सिरक ओढेर बस्नमा नै व्यस्त छन् ।
