अभिनेता निर शाहले मुख्य पात्रको रूपमा अभिनय गरेको चलचित्र 'छबिलाल कन्जुस छैन' को शिर्ष गीत फिल्मीखबर डटकमले वर्ल्डप्रिमियर गरेको छ ।
ज्ञानेन्द्र देउजाको निर्देशनमा संजय कुटुले निर्माण गरेको सो चलचित्रको सार्वजनिक गीतमा महेश खड्काको संगीत रहेको छ । प्रमोद ढुंगानाको शब्द रहेको सो गीतमा राजेश पायल राईको स्वर सुन्न सकिने छ । गीतमा निर शाहलाई कमेडी पात्रको रूपमा प्रस्तुत गरिएको छ र उनलाई हाँस्यकलाकार बिष्णु सापकोटाले साथ दिएका छन् । यसैगरी गीतमा सुमन सिंहलाई पनि देख्न सकिनेछ ।
भ्यालेनटाईन डे अर्थात प्रेम दिवसको अवसर पारेर सार्वजनिक गर्ने तयारी गरिएको सो चलचित्रलाई प्रेमीहरूका लागि गिफ्ट रहेको निर्देशक देउजा बताउँछन् । त्यसैले गर्दा उनले चलचित्रको पोस्टरमा समेत 'ह्याप्पी भ्यालेनटाईन डे' भनि उल्लेख गरेका छन् । चलचित्रको प्रचार प्रसारलाई तिब्र पार्न थालेका निर्देशक देउजाले केहि सातमा नै भ्यालेनटाईन स्पेसल गीत रिलिज गर्ने बताए ।
साजन फिल्म्स प्रालिको प्रस्तुतीमा संजय कुटुले निर्माण गरेको पारिवारिक कमेडी चलचित्रमा राजेश हमाल, निर शाह, सुमन सिंह, सुमिना घिमिरे र बिष्णु सापकोटाको मुख्य अभिनय गरेको छ । चलचित्रमा मौनता श्रेष्ठको लेखन, महेश खड्काको संगीत, हिमाल केसीको द्वन्द, बसन्त श्रेष्ठको नृत्य र रामशरण उप्रेतीको छायाँकन रहेको छ ।
चलचित्र क्षेत्रबाट सन्यास लिन्छु भनेकी नायिका सुमिना घिमिरेले अभिनय गरेको पहिलो चलचित्र यहि नै हो । उनी यस चलचित्रमा नायक सुमन सिंहसँग अनस्क्रिन रोमान्स गरेकी छिन् । सुमिना र सुमनले अभिनय गरेको रोमान्टीक श्रेणीको गीत पनि अर्को साता सार्वजनिक गरिनेछ ।
