नेपाली कलाकारहरु प्रति रुची राख्ने रामजी अवाल जस्ता ब्यक्ति नेपालमा सायदै छन् होला । त्यसैले विगत १७ बर्षदेखि रेष्टुरा ब्यावसाय सञ्चालन गरिरहेका ३३ बर्षे रामजीले कलाकारहरु प्रति क्रेज बढाएको करिब तीन बर्ष भैसक्यो । जुन प्रमाण त्रिपुरेश्वरमा रहेको उनको सुजल क्याफे एण्ड सोफा रेष्टूरेन्टमा पुग्दा सजिलै देख्न सकिन्छ ।
चार बर्षअघि निर्देशक सोभित बस्नेतसंग अनयासै नजिक भएका रामजी त्यतिबेला देखि सेलिब्रेटी प्रेमी भएका रहेछन् र सेलिब्रेटी देख्नासाथ आफूसंग रहेको एसएलआर क्यामेराले उनीहरुसंग तस्बिर खिचाउन उनी अग्रसर भैहाल्छन र सम्बन्ध पनि न्यानो बनाउने कोषिसमा लाग्छन् । जस अनुरुप सेलिब्रेटीसंग खिचिएका सयौ तस्बिरहरु उनले आफ्नो क्याफेका भित्तैभरी झुण्डाएको देख्न सकिन्छ ।
उनले राजेश हमाल, रेखा थापा, गायक राजेश पायल राई, संगीतकार शम्भुजीत बास्कोटा देखि लिएर पत्रकारिता जगतमा नाम कमाएका विभिन्न ब्यक्ति लगायत विभिन्न बिधाका सेलिब्रेटीसंग खिचेको फोटोलाई क्याफेमा सजाउदै भिन्न सौन्दर्यता दिएका छन् । पछिल्लो समय आफ्नो क्याफेमा फिल्म सम्बन्धी विभिन्न कार्यक्रम भैरहेकाले पनि नेपालमा सवै कलाकारहरुसंग फोटो खिचाउने सपना पुरा गर्न सहज भईरहेको उनले फिल्मीखबर समक्ष बताए ।
'कलाकार गहना हुन् त्यसैले म कलाकारलाई सम्मान गर्छु', राम्रो फुटवल खेलाडी समेत रहेका कलाकार क्रेजी रामजी अवालले भने । भक्तपुरका रैथानै अवालले विशेषगरी हरिबंश आचार्य र मदनकृष्ण श्रेष्ठसंग फोटो खिचाउने आफ्नो ठूलो सपना रहेको बताए । भावुक मुद्रामा उनले भने, 'यदि उहाँहरुलाई जहाँ भेट्छु एक पटक उहाँहरुको खुट्टा ढोग्ने छु । किन कि उहाँहरु देवता समान हुनुहुन्छ । '
उनको क्याफेमा राजनीनितीककर्मीको तस्बिर भने झुण्डाईएको छैन । नेताहरु तपाईलाई मन पर्दैन भन्ने प्रश्नमा उनले भने, 'आई हेट देम । बस यति हो कि म कलाकार क्रेजी हुँ ।' रामजी कलाकार प्रेमी भएको तीन बर्ष भएको एउटा पाटो मात्र हो तर उनी अन्य बिधासंग सम्बन्धीत भएर फोटो खिच्न पनि निकै सौखिन छन् । उनले नेपालमा पाईने करिब ३७ सय प्रजातिका फूलहरु समेत खिचेर कलेक्सन गरेको बताए । यस्तै देशभरिका मठ मन्दिर, चैत्य, गुम्बाका तस्बिरहरु पनि उनले आफ्ना क्यामेरामा कैद गरेको बताएका छन् ।
'मेरो देशको सम्पत्ती म मेरो घरमा सजाउन चाहन्छु', रामजीले भने । यस्तै फोटो कलेक्सनकै लागि उनले ७५ जिल्ला भ्रमण गर्ने सोचाईमा बनाईरहेको बताए । कलाकार क्रेजी भएकै कारणले उनले दुईवटा म्यूजिक भिडियोमा आफ्नो अनुहार पनि देखाईसकेका छन् । यसैगरी कलाकारहरुको साथ पाईरहे केही बर्षभित्रै फिल्म निर्माण गर्ने सोच रहेको उनको भावी योजना छ ।
