आज शुक्रबारबाट दुई चलचित्र प्रदर्शनमा आएका छन् । रञ्जित रानाले निर्देशन गरेको चलचित्र 'बाटुली' काठमाण्डौ उपत्यकाका सिनेमा घरमा चलिरहेको छ भने बाबुराम ढकालले निर्देशन गरेको चलचित्र 'पर्खिराख है' मोफसलका सिनेमा घरमा चलिरहेको छ ।
करिब दुई बर्ष अगाडी मोफसलका हलबाट सफलता हात पारेको चलचित्र 'बाटुली' लाई डाक्टरसिँह गुरुङले निर्माण गरेका हुन् । एक्सन प्रधान चलचित्र बाटुलीमा मल्टिस्टार राजेश हमाल, बिराज भट्ट, रेखा थापा लगायतले अभिनय गरेका छन् । यो चलचित्र क्यू प्रणाली मार्फत करिब डेढ दर्जन सिनेमा घरमा लागेको छ ।
यस्तै फ्रेस चलचित्रको रूपमा दिल श्रेष्ठले निर्माण गरेको पारिवारिक प्रेमकथामा आधारित चलचित्र 'पर्खिराख है' मा मुकेश ढकाल, मेलिना मानन्धर, सञ्चिता लुईटेल, दिल श्रेष्ठको मुख्य भुमिका रहेको छ । चलचित्रले दिदी भाईको माया प्रेमकथालाई उठान गरेको छ । निर्माता दिल श्रेष्ठको डेब्यू चलचित्र पर्खिराख है' राजधानीमा भने मंसिर २३ गते लाग्नेछ ।
