बरिष्ठ गीतकार डा. भोला रिजालका छोरा डा. कपिल रिजालले पनि चलचित्र निर्माणमा हात हाल्ने भएका छन् । विगत अठार बर्ष देखि लण्डन बस्दै आएका डा. कपिलले छिट्टै नै चलचित्र निर्माणको कार्यमा सक्रिय हुने जानकारी दिए ।
मंगलबार चलचित्र 'थ्री लभर्स' को सुटिङ हेर्न स्क्रिप्ट राईटर प्रदिप भारद्धाजसँग नुतन स्टुडियो पुगेका कपिल अहिले सुटिङको माहोल हेर्नमा व्यस्त छन् । उनले सुरज सुब्बाले निर्देशन गरिरहेको चलचित्र 'फेसबुक' को सुटिङ माहोल पनि हेरे भने 'आई एम सरी' को पोस्टप्रोडक्सन भएको स्थान पनि पुगे । हरेक काम प्लानिङ अनुसार गर्नु पर्छ भन्ने मान्यता राख्ने यि नवनिर्माता हतारमा काम गर्न चाहदैनन् । भन्छन्, 'हामी हरेक काम प्लानिङ गरेर नै गर्छौं । जबसम्म हाम्रो प्लानिङ कम्प्लिट हुँदैन तबसम्म फ्लोरमा जाँदैनौं ।'
आफ्नै पिता चलचित्रकर्मी भएको नाताले पनि नेपाली चलचित्र प्रति झुकाव रहेको बताउने कपिल नेपाली चलचित्रलाई मनै देखि माया गर्ने बताउँछन् । पछिल्लो समय डिभिडीमा छोडि गए पाप लाग्ला चलचित्र हेरेका कपिलले परालको आगोले मन छोएको बताए । केहि म्युजिक भिडियोको निर्देशक बनिसकेका कपिल आफूले बनाउने चलचित्र दर्शकको मन छुने खालको हुने बताउँछन् । बुझ्नमा आए अनुसार कपिल आफैले चलचित्रको निर्देशन पनि गर्ने योजनामा छन् तर उनले यो कुरालाई भने बाहिर ल्याएका छैनन् ।
