फाल्गुन ५ गते अर्थात भ्यालेनटाईन विकमा भुवन केसीको चलचित्र 'साथी म तिम्रो' रिलिज नहुने भएको छ । क्यू प्रणालीबाट रिलिज हुन लागेको सो चलचित्रले फाल्गुन १९ गतेको डेट पाएको छ ।
भ्यालेनटाईन विकमा चलचित्र रिलिज गर्न कस्सिएका भुवनले फाल्गुन १९ गते नै आफ्नो चलचित्रको रिलिज डेट फिक्स भएको बताए । हाल टिकापुर महोत्सवमा रहेका भुवनले फिल्मीखबरसँग कुरा गर्दै भने, 'पाँच गते चल्ने कुरा भए पनि डेट फिक्स थिएन तर अब भने डेट नै फिक्स गरिएको छ । दर्शकहरू १९ गते मेरो फिल्म हेर्न तयार भएर बसे हुन्छ ।'
भुवन केसीको मेघा प्रोजेक्टको उक्त चलचित्र १९ गते सरेपछि फाल्गुन ५ गते चल्ने अर्का नायक दिलिप रायमाझीको मेघा प्रोजेक्ट चलचित्र 'मिस यू' लाई राम्रै फाईदा हुने भएको छ । सुरेश दर्पण पोखरेल निर्देशित चलचित्र 'मिस यू' लाई डिसिएनले बितरण गर्नेछ । जुन चलचित्र बिग सिनेमा, क्यूएफएक्स लगायतका मल्टिप्लेक्स हल सहित देशभर एकसाथ प्रदर्शनमा आउने छ ।
दुई मेघा प्रोजेक्टका चलचित्र एकैसाथ जुध्नु निर्माताका लागि मात्र नभएर उधोगका लागि पनि घाटा हुने भएकाले भुवन केसीको चलचित्र पछि सरेको बुझिएको छ ।
