भ्यालेन्टाईन डे अर्थात प्रेम दिवसको छेकोमा माघ २० गते नेपालमा रिलिज हुन लागेको चलचित्र 'छबिलाल कन्जुस छैन' लाई गल्फ कन्ट्रीमा पनि रिलिज गरिंदै छ । दुबई लगायतका केहि देशमा यो चलचित्र सम्भवत: जनवरी महिनाको दोस्रो साता रिलिज हुनेछ ।
दुबईको सन हिल सिनेमा प्रोडक्सनले राम्रो मूल्य दिएर गल्फ कन्ट्रीको रिलिज अधिकार लिएको चलचित्रका निर्देशक ज्ञानेन्द्र देउजाले फिल्मीखबरलाई जानकारी गराए । उनले भने, 'चलचित्रको बारेमा राम्रो प्रतिक्रिया थाहा पाएर सन हिल सिनेमा प्रोडक्सनले चलचित्रको रिलिज अधिकार माग्यो र हामीले उचित मूल्यमा नै बेच्यौं ।'
नेपालमा भन्दा पहिला बिदेशमा आफ्नो चलचित्र रिलिज हुन लाग्दा निकै खुसी भएका निर्देशक देउजाले अमेरिका र अष्ट्रेलियामा पनि चलचित्र रिलिज हुन सक्ने सम्भावना रहेको बताए । दुबईमा हुने प्रिमियरमा चलचित्रका नायक राजेश हमाल र सुमन सिंह जाने प्रवल सम्भावना रहेको पनि निर्देशक देउजाले बताए ।
संजय कुटुले निर्माण गरेको चलचित्र 'छबिलाल कन्जुस छैन' मा राजेश हमाल, निर शाह, सुमन सिंह, सुमिना घिमिरे र बिष्णु सापकोटाको मुख्य अभिनय गरेको छ । चलचित्रमा मौनता श्रेष्ठको लेखन, महेश खड्काको संगीत, हिमाल केसीको द्वन्द, बसन्त श्रेष्ठको नृत्य र रामशरण उप्रेतीको छायाँकन रहेको छ । चलचित्र रोमान्टिक प्रेमकथामा आधारित छ ।
