माघ २० गते देखि देशभरका सिनेमा घरमा प्रदर्शनमा आउन लागेको चलचित्र 'छबिलाल कन्जुस छैन' को युनिट युएईको दुबई प्रस्थान गरेको छ । निर्देशक ज्ञानेन्द्र देउजा, नायक सुमन सिंह र अभिनेता निर शाह चलचित्रको प्रिमियरका लागि आज साँझ दुबई प्रस्थान गरेका हुन् ।
दुबईको गोल्डेन प्लाजा सिनेमा हलमा भोली शुक्रबार चलचित्रको प्रिमियर गरिंदैछ । दुबईको सन हिल प्रोडक्सनले नेपाली सिनेमाको बजार विस्तार कार्यलाई अगाडी बढाउने योजना अनुरूप चलचित्रको नियमित प्रदर्शन गर्ने व्यवस्था समेत गरेको छ । खाडी मुलुकमा पहिलो पटक नियमित प्रदर्शन हुन लागेको यो पहिलो चलचित्र हुनेछ । चलचित्रको प्रिमियरमा सहभागी भए लग्गतै युनिट १/२ दिनमा नै नेपाल फर्कने छ ।
संजय कुटुले निर्माण गरेको चलचित्र 'छबिलाल कन्जुस छैन' मा राजेश हमाल, निर शाह, सुमन सिंह, सुमिना घिमिरे र बिष्णु सापकोटाको मुख्य भूमिका रहेको छ । चलचित्रमा मौनता श्रेष्ठको लेखन, महेश खड्काको संगीत, हिमाल केसीको द्वन्द, बसन्त श्रेष्ठको नृत्य र रामशरण उप्रेतीको छायाँकन रहेको छ । चलचित्र रोमान्टिक प्रेमकथामा आधारित छ ।
