ग्रामिण भेगबाट थुप्रै सपना बोकेर शहर पसेका युवाहरूको संघर्षको कथालाई फिल्म 'अन्तराल' मा मुख्य बिषय बनाईएको छ जसको राजधानीमा धमाधम सुटिङ भईरहेको छ । महिला निर्देशक दीपा बस्नेतले आज १४ औं दिनमा एक्सन कट भनिरहेकी छिन् । यसै फिल्मबाट फिचर फिल्ममा डेब्यू गरेकी दीपाले आफ्नो फिल्मले आम युवाहरूको कथा बोकेको बताईन् ।
४५ प्रतिशत सुटिङ सकिएको जानकारी दिंदै निर्देशक दीपाले नयाँ टिमले नयाँ जोश र जाँगरका साथ काम गरेको बताईन् । उनले भनिन्, 'हाम्रो टिम नयाँ भने पनि काम गर्न निकै सहज भएको छ ।' अनामनगरको एक घरमा नयाँ अनुहार कमलमणी नेपाल र अशिष्मा नकर्मीलाई निर्देशन दिईरहेकी दीपाले भनिन्, 'टिमको को-अर्डिनेशन मिलेकाले काम गर्न गार्हो भएको छैन ।' एक महिना वर्कशप गरेकाले पनि सुटिङमा सहज भएको उनको भनाई छ ।
आधा दर्जन जति म्युजिक भिडियोको निर्देशन तथा केहि डमुकेन्ट्रीको निर्देशन गरेकी दीपा राम्रो अभिनय गर्न सक्ने कलाकार समेत हुन् । फिचर फिल्म पहिलो भएकाले केहि चुनौती छ तर राम्रो गर्न सक्ने कन्फिडेन्ट छ', दीपाले भनिन्, 'मेरो पारिवारिक पृष्ठभूमी पनि कला क्षेत्रकै भएकाले मलाई काम गर्न सजिलो भएको हो ।'
जीवनसाथी फिल्मसको व्यानरमा निर्माण शुरू गरिएको सो फिल्ममा कमलमणी र अशिष्माको साथमा अमितेश शाह, राजकुमार पुडासैनी, लोकेन्द्र लेखक, मानव सुवेदी, उज्जवल शर्मा भण्डारी, नवराज खड्का, नम्रता सापकोटा, जेसिका बोगटी लगायतले अभिनय गर्दैछन् । शशि विक्रम थापाको संगीत रहने फिल्मलाई शिबराम श्रेष्ठले खिचिरहेका छन् । फिल्मको सुटिङ २८ दिनमा सक्ने लक्ष्य राखिएको छ ।
