मंसिर ८ गतेको देशब्यापी रिलिज मिती तय गरिएको फिल्म समयको प्रेस मिट गर्दै अफिशियल प्रोमोसंगै अडियो सार्वजनिक गरियो । दयाराम दाहालको ४१ औँ फिल्म निर्देशन रहेको यो फिल्मलाई सन्देश श्रेष्ठसंगको संयुक्त प्रोडक्सनमा अभिनेत्री मौसमी मल्लले निर्माण गरेकी हुन् ।
मौसमीले यहि फिल्म मार्फत जेठो छोरा विक्कीलाई हिरोको रुपमा रजतपटमा डेब्यू गराएकी छिन् । यस्तै यहि फिल्म मार्फत सुरभी बिष्टले हिरोईनको ट्याग पाएकी छिन् । लक्ष्मण शेषको संगीत समावेश फिल्मलाई दुई पुस्ताको रोचक कथा भनिएको छ । फिल्ममा राजेश हमाल पहिलो पुस्ताको नेतृत्व गर्दै प्रमुख भूमिकामा छन् भने संस्कृति घिमिरेले पनि यहि फिल्मबाट अभिनय यात्रा सुरु गरेको कार्यक्रममा जानकारी गराईयो ।
फुटबलर सागर थापा लगायत फिल्म क्षेत्रका प्रमुख संघसंस्थाका पदाधिकारीको उपस्थितीमा आयोजित प्रेस मिटमा फष्टलुक पोष्टर पनि सार्वजनिक गरिएको थियो । कार्यक्रममा निर्माता संघका अध्यक्ष राजकुमार राईले अनुभवी कलाकार मल्ल र अनुभवी निर्देशक दाहालले बनाएको फिल्ममा उत्कृष्ट हुन सक्ने आधारहरु प्रशस्त रहेको बताए ।
