सञ्चारकर्मी लक्ष्मण सुवेदीको निर्देशनमा निर्माण हुने फिल्म एउटा साथीमा आदित्य नारायण झाले स्वर भर्ने भएका छन् । उदित पुत्रको स्वर डविङ गर्न फिल्म निर्माता शोभित बस्नेत आउने साता मुम्बई जाँदैछन् ।
फिल्मका चार लभ गीत मध्ये ३ वटामा उदित पुत्र सहित अन्य भारतीय युवा सिङ्गरको स्वर रहने निर्देशक सुवेदीले बताए । उनले भने- 'युवापुस्तालाई नयाँ स्वाद दिन आदित्य सहित भारतीय युवा सिङ्गरको स्वर रेकर्ड गराउन लागिएको हो ।' माता र पिताले थुप्रै नेपाली फिल्मका गीत गाए पनि आदित्यले भने खासै नेपाली फिल्ममा गीत गाएको पाईदैन । एउटा साथीमा गीत गाएपश्चात आदित्य नेपाली गीतसंगीतको साथी बन्लान् त ?
फिल्मको एउटा गीतलाई गायक आनन्द कार्की, शुधा रत्न र संगीतकार टंक बुढाथोकीले रेकर्ड गराइसकेका छन् । गीतको शब्द शंकर अधिकारी घायलले लेखेका हुन् । मनोरञ्जनात्मक फिल्ममा निर्देशक तथा निर्माता शोभित बस्नेतका पुत्र सलोन बस्नेत मुख्य भुमिकामा प्रस्तुत हुनेछन् । उनको अपोजिटमा रिस्ता बस्नेत प्रस्तुत हुनेछिन् ।
एउटा साथीमा सौरभ कार्कीको क्यामेरा, राजेन्द्र खड्गीको फाईट डिरेक्सन र गम्भिर विष्टको नृत्य निर्देशन रहनेछ । फिल्म भदौको दोस्रो साताबाट फ्लोर जाँदैछ । फिल्मलाई काठमाण्डौ, पोखरा र जोमसोममा सुट गरिनेछ ।
