घोषणा अनुरुप निर्देशक सबिर श्रेष्ठले फिल्म ‘रेड वाइन’को निर्माण नगर्ने भएका छन् । यस फिल्ममा अब सविरको निर्देशन मात्रै रहनेछ । ‘रेड वाइन’ निर्माणको जिम्मा महेश बाबु तिमल्सिनाले लिएका छन् ।
नयाँ निर्माता तिमल्सिनासँग ‘रेड वाइन’ निर्माणको सम्झौता भएको जानकारी दिदै निर्देशक सविर श्रेष्ठले भने, ‘मेरो आफ्नै लगानीमा ‘तथास्तु’ निर्माण हुँदैछ । ‘तथास्तु’ले गर्दा ‘रेड वाइन’ मा लगानी नगरेको हुँ ।’ ‘तथास्तु’ कै स्क्रिप्ट राईटर जगदिश्वेर थापाले ‘रेड वाइन’ को स्क्रिप्ट लेख्दैछन् ।
भदौ १५ गतेबाट ‘रेड वाइन’ फ्लोरमा जाने निर्देशक श्रेष्ठले बताए । फिल्मको कलाकार भने फाइनल हुन बाँकी छ । निर्माण एवं निर्देशन रहने सविरको ‘तथास्तु’ को छायाँकन भने यही १९ गतेबाट प्रारम्भ हुँदैछ । सविरको ‘तथास्तु’ मा रेखा थापा र अभिनेता किशोर खतिवडा मुख्य कलाकारको रुपमा फाइनल भएका छन् । वर्ष ०७० सालमा सुपरहिट ‘काली’ र मध्यम व्यापारको ‘आधी बाटो’ दिएका सविरले ‘तथास्तु’ कस्तो बनाउलान् ?
