Nepal's No.1 Filmy Web Magazine
कुनै बेला थियो, नेपाली फिल्ममा विपना थापा निर्विकल्प अभिनेत्रीझैँ थिइन् । विशेषगरी गाउँले र दुःखी चरित्रमा उनी पहिलो रोजाई बनेकी थिइन् । अभिनय पनि सशक्त भएकाले उनी करिब डेढ दशक करिअरको उचाइँमा रहिन् । तर, भारतीय नागरिकसँग विवाहपछि उनको अभिनयमा सक्रियता कम हुँदै गयो । सन्तान भएपछि त करिब १३ वर्ष अभिनयबाट पूर्ण रुपमा टाढा नै रहिन् ।
१३ वर्षको अन्तरालमा दुईपटक हलमा प्रदर्शन गरिएको स्वर्गीय गायक तथा संगीतकार भक्तराज आचार्यको जीवनकथामा आधारित फिल्म ‘आचार्य’ अब निःशुल्क प्लेटफर्म युट्युबमा उपलब्ध भएको छ । बुधबार फिल्मलाई ओएसआर डिजिटलको युट्युब च्यानलमा सार्वजनिक गरिएको हो । युट्युबमा फिल्मलाई अब्बल प्रतिक्रिया मिलेको छ । प्रायःले मनछुने फिल्म भनेका छन् ।
अभिनयमा पारंगत मानिन्छन्, माओत्से गुरुङ । रंगमञ्च पृष्ठभूमिका उनले हरेक प्रकारका चरित्रमा प्राण भरेका छन् । दुई दर्जन बढी फिल्ममा काम गरिसकेका उनको नयाँ फिल्म ‘अग्निदहन’ आगामी मंसिर ७ गतेबाट प्रदर्शनमा आउने तयारीमा छ, जुन बोक्सी कुप्रथाको कथामा बनेको हो । यसमा उनी धामीको भूमिकामा छन् । ट्रेलरमा उनले बोक्सीको आरोप लगाएर महिलामाथि कुटपिट गरेको र मलमूत्र खुवाउन आदेश दिएको देख्न सकिन्छ ।
अब ‘कबड्डी ४’ सर्वाधिक कमाई गर्ने फिल्म रहेन । यसको रेकर्ड ‘पूर्ण बहादुरको सारङ्गी’ले तोडेको छ । दुई वर्षअघि ‘कबड्डी ४’ले २३ करोड ५० लाख (निर्माताको दाबीअनुसार) कमाउँदै सर्वाधिक कमाउने नेपाली फिल्मको कीर्तिमान बनाएको थियो । यो आँकडा ‘सारङ्गी’ले १३ दिनमा नै कटाएको छ । फिल्मले मंगलबारसम्ममा २५ करोडमाथि कमाई गरेको वितरक कम्पनी ब्यांकटेस इन्टरटेनमेन्टको दाबी छ । चलचित्र विकास बोर्डले भने बक्स अफिस रिपोर्ट सार्वजनिक गरेको छैन ।
लक्ष्मीपूजाबाट प्रदर्शनमा आएको फिल्म ‘पूर्ण बहादुरको सारङ्गी’ले हलमा आफ्नो दबदबा कायम गरिरहँदा यही शुक्रबारबाट बक्स अफिसमा चुनौती फिल्म ‘ह्रस्व दीर्घ’ प्रदर्शनमा आउँदैछ । बुधबारबाट देशभरका प्रायः मल्टीप्लेक्सहरुले फिल्मका लागि शो उपलब्ध गराउँदै बुकिङ खुला गरेका छन् । ‘सारङ्गी’को सुनामी व्यापारका कारण फिल्मले अपेक्षित शो भने पाउन सकेको छैन ।
आगामी मंसिर ७ गतेबाट प्रदर्शनको तयारीमा रहेको फिल्म ‘तेल भिसा’का निर्देशक शंकर घिमिरे र अभिनेत्री तथा निर्मात्री ऋचा घिमिरेविरुद्ध ठगीको आरोपमा प्रहरीमा उजुरी परेको छ । उनीहरुले अमेरिका लैजान्छु भन्दै ठगी गरेको दाबीसहित जिल्ला प्रहरी परिसर काठमाडौंमा उजुरी परेको हो । प्रहरीले उजुरी दिने व्यक्तिको नाम भने खुलाएको छैन ।
