Nepal's No.1 Filmy Web Magazine
नेपालपछि फिल्म ‘चित्रा’लाई अब अष्ट्रेलियामा प्रदर्शन गरिने भएको छ । फेब्रअरी ९ अर्थात् माघ २६ गते अष्ट्रेलियाको तासमानिया राज्यको भिलेज सिनेमाज् इस्टल्यान्डसमा फिल्मको पहिलो शो हुन लागेको हो । अष्ट्रेलियन ३० डलर टिकट मूल्य निर्धारण गरिएको फिल्मको शोमा स्थानीय मेयर पनि सहभागी हुने जनाइएको छ । यसपछि अष्ट्रेलियाको अन्य शहरमा फिल्मको प्रदर्शन गरिनेछ ।
शंकर कोइरालाको निर्देशनमा बन्न लागेको फिल्म ‘मोदीबेनी’को शुभमुहूर्त गर्दै छायांकन सुरु गरिएको छ । मंगलबार काठमाडौंको कमलादीस्थित गणेश मन्दिरमा स्क्रिप्ट, क्यामेरा र क्ल्याप बोर्ड पूजा गरेपछि निर्माण टिम छायांकनका लागि काभ्रे प्रस्थान गरेको हो । फिल्ममा अभिनेत्री केकी अधिकारीको अभिनय रहन सक्ने चर्चाबीच उनको ठाउँमा वर्षा सिवाकोटीलाई अनुबन्धित गरिएको छ ।
अभिनेता सलिनमान बनियाँले ५ वर्षपछि फिल्ममा कमब्याक गर्ने भएका छन् । २०७५ सालमा प्रदर्शन भएको फिल्म ‘यात्रा’पछि अभिनयमा निस्क्रिय देखिएका उनले फिल्म ‘यूनिभर्सिटी अफ गुन्डाज्’बाट कमब्याक गर्न लागेका हुन् । मंगलबार एक पोस्टरमार्फत् फिल्मको औपचारिक रुपमा निर्माण घोषणा गरिँदैछ ।
‘ऐंचो पैंचो’ निर्देशक तथा निर्मात्री कृषा चौलागाईंको आगामी फिल्म ‘पिताम्बर’मा कलाकारको ‘लाइनअप’ बलियो बनेको छ । यही माघ अन्तिमबाट छायांकन सुरु हुन लागेको फिल्ममा प्रदीप खड्का, सुरक्षा पन्त, प्रमोद अग्रहरी र कामेश्वर चौरासियापछि सौगात मल्ल, आँचल शर्मा, अनुपविक्रम शाह र दिव्यदेव अनुबन्ध भएका छन् । कलाकारको यो ‘लाइनअप’ले फिल्म रोचक बन्ने देखिन्छ ।
अभिनेता माओत्से गुरुङको डेब्यु निर्देशित फिल्म ‘दयारानी’को पारिवारिक कथामा आधारित ट्रेलर सार्वजनिक गरिएको छ । निःसन्तान दम्पतीको कथामा केन्द्रित रहेको ट्रेलरमा दयाहाङ राईले आफू बाबु बन्न नसक्ने तथ्य लुकाएर श्रीमती (दीया पुन)लाई दोष लगाउँछन् । त्यसपछि दीयाले दोस्रो विवाह गर्न दबाब दिएपछि उत्पन्न परिस्थितिलाई ट्रेलरमा रोचक र मर्मस्पर्शी शैलीमा देखाइएको छ ।
यही माघ २६ गतेबाट प्रदर्शनमा आउन लागेको फिल्म ‘हात्तीछाप’ सामाजिक कार्यमा पनि जोडिएको छ । माघ १३ गते (शनिबार) फिल्मको टिमले लायन्स क्लबसँगको सहकार्य गरेर किस्पाङ २ स्थित सातदोबाटोमा निःशुल्क स्वास्थ्य शिविरको आयोजना गरेको थियो । उक्त शिविरमा १५ लाखभन्दा बढीको औषधि निःशुल्क रुपमा वितरण गरिएको निर्माता करण नेपालीले जानकारी दिए ।
