Nepal's No.1 Filmy Web Magazine
गत मंसिरपछि नेपाली फिल्मको व्यापार सेलाएको छ । ठूला ‘स्टार’का फिल्मले समेत दर्शक तान्न सकेनन् । अब शुक्रबारबाट नयाँ फिल्म ‘केटी हराएको सूचना’ प्रदर्शनमा आएको छ । एकातिर ‘उजेली’ जस्तो यादगार डकुड्रामा बनाएका दीपेन्द्र गौचनको निर्देशन र अर्कोतिर नाजिर हुसेन र सृष्टि श्रेष्ठ जस्ता नाम चलेका कलाकार भएकाले फिल्मले हलमा दर्शक फर्काउने अपेक्षा गरिएको छ ।
चर्चित हास्य टेलिसिरियल ‘सक्किगोनि’ समूहको पहिलो फिल्म ‘लाज शरणम्’मा कलाकार सीताराम कट्टेल (धुर्मुस)को अभिनयबारे निर्माणको समयदेखि नै गोप्य राखिएको थियो । बिहीबार भने एक पोस्टरमार्फत् उनको क्यारेक्टर लुक्स सार्वजनिक गरिएको छ । जसमा उनी १४ जनाको हत्या गरेको अभियोगमा हाल जेलमा रहेका पूर्वमन्त्री मोहम्मद आफतव आलमको हुलियामा प्रस्तुत छन् ।
अभिनेत्री ऋचा शर्माको मुख्य भूमिका तथा प्रस्तुति रहेको फिल्म ‘सारंग’को ट्रेलर सार्वजनिक गरिएको छ । बिहीबार युट्युबमार्फत् सार्वजनिक २ मिनेट २३ सेकेण्ड लम्बाईको ट्रेलरमा पारिवारिक कलहले बच्चामा पर्ने मनोवैज्ञानिक असर र एउटै उमेर समूहका दुई अलग आर्थिक हैसियतका बालकहरुको घनिष्ट मित्रतालाई देखाइएको छ । फिल्ममा ऋचाले आमाको भूमिका निभाएकी छन् ।
बाल विवाह र महिला हिंसाविरुद्धको कथामा बनेको फिल्म ‘जुनाःएक व्यथा’को पहिलो गीत ‘आमाको मुहार’ सार्वजनिक गरिएको छ । यदु राई लकान्द्रीको पार्श्व गायन, जीवन सेन्चुरीको शब्द तथा रमेश सन्चुरीको संगीत रहेको गीतको भिडियोमा फिल्मकी मुख्य पात्र अस्मिता ढकालले बाल विवाह गरेर श्रीमानको घरमा गएपछि भोग्नुपरेको पीडा र यातनालाई मर्मस्पर्शी रुपमा देखाइएको छ ।
नेपाली फिल्म क्षेत्रमा कलाकारलाई ‘ट्याग’ दिने प्रचलन सामान्य भइसकेको छ । ‘महानायक’, ‘एक्सन स्टार’, ‘मेगास्टार’, ‘सुपरस्टार’ जस्ता ‘ट्याग’ बुक भइसकेका छन् । यतिबेला अभिनेता प्रदीप खड्कालाई फिल्म ‘एक्टर: टेक वन’को ट्रेलरमा ‘सुपरस्टार’को ट्याग दिएको विषय चर्चामा छ । यो ट्याग उनकै चाहनामा राखिएको हो वा निर्माता/निर्देशकले दिएका हुन् भन्ने चासोमा धेरैमा देखिन्छ ।
