Nepal's No.1 Filmy Web Magazine

लामो समयदेखि चर्चामा रहेको नाम हो, ‘माग्ने राजा’ । दुई वर्षअघि दीपकराज गिरी र दीपाश्री निरौलाले यो नाममा फिल्म बनाउन लागेका थिए । तर, पछि यसैको स्क्रिप्टमा ‘छक्कापञ्जा ४’ बनाए । यद्यपि, उनीहरु ढिलोचाँडो ‘माग्ने राजा’ नाममा फिल्म बनाउने तयारीमा थिए । तर, चलचित्र विकास बोर्डबाट निर्माण इजाजत नलिएकाले अब यो नाम दीपक-दीपाको हातबाट फुत्किएको छ ।

गत कात्तिक ३० गतेबाट नेपालमा प्रदर्शन भएको फिल्म ‘ह्रस्व दीर्घ’को ओटीटी र स्याटेलाइट (टिभी) राइट्स भारतीय कम्पनी जी-नेटवर्कले खरिद गरेको छ । बुधबार फिल्मकी निर्मात्री तथा अभिनेत्री नीता ढुंगाना र अभिनेता हरिहर अधिकारीसँग जी-नेटवर्कका अधिकारीले दुईवटा राइट्सको खरिद सम्झौता गरेका हुन् । यसको जानकारी नीता र हरिहरले फेसबुकमार्फत् गराएका छन् ।

अभिनेत्री सुरक्षा पन्त र अभिनेता प्रदीप खड्काले पहिलोपटक फिल्ममा सहकार्य गरेका छन् । त्यो फिल्म हो, ‘पिताम्बर’ । तर, यसमा उनीहरुको जोडी भने बाँधिएको छैन । न त स्क्रिनमा नै एकसाथ देखिनेछन् । यो फिल्मको छायांकन सकाएर यसै साता काठमाडौंमा आयोजित एक फेस्टिभलको कार्यक्रममा सहभागी भएका उनीहरुले एकअर्काको खुलेर तारिफ गरेका थिए ।

निर्देशक सुदीप भुपाल सिंहले फिल्म ‘श्री बुकुरो’बाट ७ वर्षपछि निर्देशनमा कमब्याक गरेका छन् । मंगलबार स्केच पोस्टरमार्फत् उनले आफ्नो कमब्याक फिल्मबारे जानकारी गराए । यो उनको तेस्रो निर्देशकीय फिल्म हो । पछिल्लो पटक सन् २०१७ मा रिलिज भएको ‘रुद्रप्रिया’ निर्देशन गरेका उनले त्यसअघि हरर जनरामा ‘माला’ बनाएका थिए ।

अभिनेता दयाहाङ राईको शीर्ष भूमिका रहेको फिल्म ‘कार्साङ’ आगामी पुष २६ गतेबाट प्रदर्शनको तयारीमा छ । यसमा उनले शेर्पा समुदायको धामीको भूमिका निभाएका छन् । उनको करिअरमै यसकिसिमको भूमिका पहिलो हो । यसैले पनि फिल्मप्रति दर्शकमा चासो देखिएको छ । यसमा दयाहाङसहित जितु नेपाल, दीया मास्के, सिर्जना निङलेखुको पनि मुख्य भूमिका छ ।

निर्माता सरोज न्यौपाने आफ्नो पछिल्लो फिल्म ‘ग्याङस्टर ब्लूज’ (२०१७)ले व्यावसायिक सफलता हासिल गर्न नसकेपछि करिब ६ वर्ष निर्माणबाट टाढा देखिए । अब भने उनी लगातार फिल्म निर्माण गर्न कसिएका छन् । यतिबेला उनको नयाँ फिल्म ‘जेरी अन टप’ फ्लोरमा छ । यसलाई आगामी जेठमा रिलिजको तयारी गरिएको छ ।