.jpg)
यशराज ब्यानरको नयाँ फिल्म ‘बन्टी और बबली २’ रिलिजको मुखमा छ । जसमा सैफ अली खान र रानी मुखर्जी लिड रोलमा छन् । यो फिल्म २००५ मा आएको ‘बन्टी और बबली’ को सिक्वेल हो । यसमा रानी मुखर्जी र अभिषेक बच्चनको अभिनय थियो । तर, सिक्वेलमा अभिषेकको ठाउँ सैफले लिए । आदित्य चोपडासँगको झगडाले गर्दा फिल्मको सिक्वेलमा अभिषेक नअटेको बताइन्छ ।
‘धूम ३’ निर्माणको क्रममा यशराज ब्यानरका प्रमुख तथा निर्माता आदित्य चोपडा र अभिषेकबीच प्रोफेशनल मनमुटाव भएको थियो । जसका कारण ‘बन्टी और बबली २’ मा आदित्यले सैफलाई लिएको भारतीय मिडियाको दाबी छ । आमिर खानका कारण ‘धूम ३’ को स्क्रिप्ट बारम्बार परिवर्तन गर्नु र क्लाइमेक्स पनि विना जानकारी परिवर्तन भएपछि अभिषेकले दृढतापूर्वक विरोध गरेका थिए ।
उनले अब ‘धूम’ फ्रेन्चाइज नगर्ने समेत निर्णय लिएका थिए । एक सूत्रले बलिउड हंगामालाई भनेको छ, ‘फिल्म ‘धूम ३’ को क्रममा भएको मनमुटावका कारण अभिषेक र आदित्यबीच कोल्ड वार सुरु भयो । तर, ‘बन्टी और बबली २’ पहिला अभिषेकलाई अफर भएको थियो । तर, उनले अस्वीकार गरे ।’ रोचक कुरा के भने ‘बन्टी और बबली’ पछि रानी र अभिषेकको पनि बोलचाल छैन ।
