आगामी कात्तिक १८ गतेबाट प्रदर्शन हुन लागेको फिल्म ‘मिलन’को टिजर सार्वजनिक भएको छ । बिहीवार ‘टाकुरा फिल्मस्’को युट्युब च्यानलबाट सार्वजनिक १ मिनेट २८ सेकेन्डको टिजरमा प्रेम र विछोडको पाटोलाई प्रस्तुत गरिएको छ । टिजरमा फिल्मका मुख्य अभिनेताद्वय कुशल शाह ठकुरी, सलोन बस्नेत र अभिनेत्री शिल्पा थापाको प्रेममा आउने उतार-चढावलाई देखाइएको छ ।
त्रिकोणात्मक प्रेमकथामा निर्मित फिल्मको टिजरमा कालिन्चोकको सुन्दर दृश्य पनि देख्न सकिन्छ । तर, टिजरमा सलोनको संवाद राखिएको छैन । कुशल र शिल्पाले यही फिल्मबाट डेब्यू गरेका हुन् । टेक पौरखी राईको निर्देशनमा तयार भएको फिल्ममा शिशिर बांग्देल, सुमिन गुरुङ, जानुका पौडेल, रेजिना एक्चै मगर, डेनियल खड्का, करन थापा मगरलगायतको पनि अभिनय छ ।
फिल्ममा राहुल राईको छायांकन, तारा किम्बे थापाको सम्पादन, टंक बहादुर राईको भिएफएक्स, राजु सेन्चुरीको संगीत, कविराज गहतराजको कोरियोग्राफी, कुमार महर्जनको द्वन्द्व निर्देशन, शैलेश श्रेष्ठकको ब्याकग्राउन्ड स्कोर छ । काठमाडौं र कालिन्चोकमा छायांकन भएको फिल्मको निर्मातामा प्रविन थापा रहेका छन् । ट्रेलर हेर्दा युवापुस्तालाई फिल्मले आकर्षिक गर्न सक्ने देखिन्छ ।
