छठको विदा पारेर प्रदर्शनमा आएको प्रदीप भट्टराईद्वारा निर्देशित फिल्म ‘महापुरूष’ले दोस्रो साता पनि बक्सअफिसमा पहिलो नम्बरमा ट्रेन्ड गरिरहेको छ । पहिलो हप्ता ५ करोड आसपासको कमाई गर्दै लगानी सुरक्षित गरेको यस फिल्मले दोस्रो हप्ताको शुक्रवार देशभर ५० देखि ६० प्रतिशतसम्म अकुपेन्सी कायम गर्दा शनिवार (आज) विहानैदेखि हाउसफुल दर्शक भित्राएको छ ।
विशेषगरि, फिल्मको कमाई सिंगल स्क्रिनभन्दा मल्टीप्लेक्समा राम्रो छ । नेपालको सबैभन्दा ठूलो मल्टीप्लेक्स चेन क्यूएफएक्सबाट निर्माताले मोटो शेयर हात पार्ने देखिन्छ । शनिवार क्यूएफएक्सले आफ्नो देशभरका च्यानलमा फिल्मलाई उपलब्ध गराएको शोमा दर्शक उपस्थिति आक्रामक छ । साँझका केही शोहरु दिउँसैबाट सोल्डआउट भएका छन् भने केही सोल्डआउटको चरणमा छन् ।
काठमाडौंका विग मुभिज, क्यूज सिनेमाज्, एफक्यूब सिनेमाज्, विएसआर मुभिज्, आईएनआई सिनेमाज्, वान सिनेमाज्, रञ्जना सिनेप्लेक्स, कीर्तिपुर सिनेप्लेक्सलगायतका मल्टीप्लेक्सहरुमा पनि दोस्रो हप्ता दर्शक अकुपेन्सी राम्रो रहेको रिपोर्ट प्राप्त छ । मोफसलतर्फ सिंगल तथा मल्टीप्लेक्सहरुमा पहिलो हप्ता दर्शकको राम्रो साथ पाएको फिल्म दोस्रो सातामा पनि कमजोर छैन ।
बलियो ‘वर्ड अफ माउथ’ले गर्दा दोस्रो हप्ताको आइतवारबाट पनि फिल्मप्रति दर्शकको आकर्षण घट्ने देखिन्न । लामो समयपछि हलमा परिवारसहित फिल्म हेर्ने दर्शकको उल्लेख्य उपस्थिति देखिएको छ । ८०-९० वर्षका वृद्ध-वृद्धा समेत लौरो र सन्तानको सहारामा फिल्म हेर्न हल पुगेका छन् । यो हेर्दा फिल्मले घरेलू बक्सअफिसमा आफूलाई लामो समयसम्म टिकाइराख्ने देखिन्छ ।
नेपालमा मात्र नभइ अमेरिकामा पनि फिल्मले दर्शकको साथ अपार पाएको छ । अमेरिकामा नेपाल ११ इन्टरटेनमेन्ट एलएलसीले फिल्मको प्रदर्शन अधिकार लिएको हो । फिल्मले अमेरिकामा व्यापारसँगै शो संख्या वृद्धि गर्दै लगेको प्रदर्शक प्रतिक सुवेदीले बताए । त्यस्तै, अष्ट्रेलियामा पनि सुखद् प्रदर्शन भइरहेको यो फिल्म आउँदो हप्ताबाट क्यानडामा समेत रिलिज हुने बताइएको छ ।
मदनकृष्ण श्रेष्ठ, हरिवंश आचार्य, गौरी मल्ल, राजाराम पौडेल, रविन्द्र सिंह बानियाँ, सिरु विष्ट, अरुण क्षेत्री र अञ्जना बराईली मुख्य भूमिका रहेको फिल्मले एकल पिताको एक्लोपनको कथालाई उठाएको छ । फिल्मको कार्यकारी निर्माता रविन्द्र सिंह बानियाँ हुन् भने निर्मातामा दिपेश खत्री रहेका छन् । ‘महापुरूष’सँगै निर्देशक प्रदीप भट्टराईले लगातार चार फिल्म सुपरहिट दिएका छन् ।
