भर्सटायल अभिनेत्रीको रुपमा चिनिएकी सुरक्षा पन्त विवाह बन्धनमा बाँधिने भएकी छन् । उनले यही फागुन २५ गते प्रेमी मानव सुवेदीसँग लगनगाँठो कस्न लागेकी हुन् । मानव गायक, निर्देशक तथा अभिनेता हुन् । चितवनमा हुन लागेको विवाहमा दुई पक्षका परिवारका सदस्यहरुको मात्र उपस्थिति रहेको जानकारी प्राप्त छ । उनीहरुले केही म्यूजिक भिडियोमा सहकार्य गरिसकेका छन् ।
फिल्म ‘अन्तराल’बाट डेब्यू गरेका मानवले ‘नेपथ्य’, ‘चिनी कम रंग कडा’ फिल्ममा पनि काम गरेका छन् । पूर्वको झापा घर भएका उनले अस्कार फिल्म कलेजबाट ब्याचलर सकाएर फिल्ममा हात हालेका थिए । ‘पैसा फल्ने बोट’, ‘आँखामा तिम्रो’लगायतका केही गीतमा आवाज समेत भरेका मानवले चर्चित गीत ‘कालो केशमा रेलिमै’सहित केही म्यूजिक भिडियोको निर्देशन पनि गरेका छन् ।
त्यस्तै, इन्जिनियरिङ पढेर फिल्म ‘सुस्केरा’बाट अभिनेत्रीको रुपमा डेब्यू गरेकी सुरक्षा अभिनयमा अब्बल मानिन्छिन् । यतिबेला ‘द पोयट आइडल’को निर्णायकमा रहेकी उनले ‘घर’, ‘भैरे’, ‘गोपी’, ‘चंगा चेट’, ‘आमा’, ‘धनपति’, ‘के घर के डेरा’ लगायतका फिल्ममा अभिनय गरिसकेकी छन् । आगामी चैत २४ गते उनी अभिनीत ‘बहाव’ र बैशाख १ गते ‘बुलाकी’ प्रदर्शनमा आउने तयारीमा छन् ।
