सन् २०१९ को ब्लकबस्टर फिल्म ‘वार’को दोस्रो श्रृंखलामा बलिउड र साउथ फिल्मका दुई सुपरस्टार आमने-सामने हुने भएका छन् । पहिलो श्रृंखलामा ऋतिक रोशन र टाइगर श्राफ मुख्य भूमिकामा रहेकोमा फिल्मको दोस्रो फ्रेन्चाइजमा ऋतिक यथावत् छन् भने अर्को क्यारेक्टरमा साउथ सुपरस्टार जूनियर एनटीआरको प्रवेश भएको छ । दुवैले पहिलो पटक एकसाथ काम गर्न लागेका हुन् ।
फिल्म ‘आरआरआर’को सफलता र ‘नाटू नाटू’ गीतले ओस्कार अवार्ड जितेपछि एनटीआरको लोकप्रियता संसारभर चुलिएको छ । यसैलाई मध्यनजर गर्दै निर्माण कम्पनी यशराजले ‘वार २’मा उनलाई महंगो पारिश्रमिक तिरेर भित्राएको हो । ऋतिकझैं एनटीआर पनि एक्सन र नृत्यमा अब्बल मानिन्छन् । फिल्ममा उनीहरुबीच खतरनाक एक्सन सिन हुने भारतीय मिडियाले दाबी गरेका छन् ।
फिल्मलाई अयान मुखर्जीले निर्देशन गर्नेछन् । अयानले यसअघि ‘ये जवानी है दीवानी’, ‘ब्रह्मास्त्र’ फिल्म निर्देशन गरिसकेका छन् । ‘वार’लाई भने सिद्धार्थ आनन्दले निर्देशन गरेका थिए । डेढ सय करोडमा निर्माण भएको यो फिल्मले भारतमा मात्रै ३ सय करोडको कलेक्सन गरेको थियो । ‘वार २’मा ऋतिक र एनटीआरमध्ये को हिरो र को भिलेनको भूमिकामा हुन्छन् भन्ने खुलासा भएको छैन ।
