कर्णालीमा प्रचलनमा रहेको जारी प्रथामा निर्माण भएको फिल्म ‘बुलाकी’लाई राजनीतिज्ञ, फिल्मकर्मी तथा रंग पत्रकारले रुचाएका छन् । बुधबार साँझ काठमाडौंको बिग मुभिजमा आयोजित स्पेशल शोमा फिल्मको कथावस्तु, प्रस्तुतिकरण, कलाकारको अभिनय र छायांकन पक्षको प्रशंसा भएको हो । विशेषगरि, अभिनेत्री सुरक्षा पन्त र अभिनेता नरेन खड्काको अभिनयको वाहवाही भयो ।

जुम्लाबाट निर्वाचित राप्रपाका सांसद ज्ञानेन्द्र शाहीले कलाकारको अभिनय, संवाद र कर्णालीको कथालाई मार्मिक ढंगले फिल्ममा प्रस्तुत गरिएको भन्दै प्रशंसा गरे । निर्देशक दिनेश डिसीले ‘बुलाकी’ कमर्सियल भ्यालुसहितको फिल्म रहेको बताउँदै सुरक्षा र नरेनको अभिनयले मन्त्रमुग्ध बनाएको बताए । शिव ढकालको हरेक फ्रेम क्यानभासको पेन्टिङ जस्तो रहेको उनको भनाई छ ।

अभिनेत्री नीता ढुंगानाले फिल्म हेर्दा छुट्टै आनन्दको अनुभूति भएको प्रतिक्रिया दिइन् । अभिनेता तथा ज्योतिष हरिहर अधिकारीले ‘बुलाकी’ले जस्तै गरी नेपाली फिल्ममा मौलिक कथा भन्न आवश्यक रहेको औंल्याए । कलाकारहरु पुष्प खड्का, गजित बिष्ट, राज कटुवाल, मुकुन भुषाल, निर्देशकद्वय नवल नेपाल, ज्ञानेन्द्र देउजा आदिले पनि फिल्मको कथाले पूरा अवधि बाँधेर राखेको बताए ।

लक्ष्मण सुनारको निर्देशन रहेको फिल्ममा विराज विष्ट, रमेश बुढाथोकी, लक्ष्मी गिरी, कुलदीप अधिकारी, सुशील पोखरेल, झलनाथ खत्री, धनवहादर राई, लक्ष्मण देवकोटा, बसन्त उदास, सोनु सेढाइ, प्रकाश कँडेल, सरस्वती खत्रीलगायतको अभिनय छ । छत्रेश्वरी म्यानेजमेन्टको ब्यानरमा स्वर्गीय मोति बिष्टको प्रस्तुति रहेको फिल्मको कथा, पटकथा तथा संवाद राजबहादुर सानेले लेखेका हुन् ।

‘बुलाकी’ले जारी प्रथालाई मियो बनाएर सन्तान नहुँदा महिलाले समाज तथा परिवारबाट सहनुपर्ने अपहेलना र वैदेशिक रोजगारीले उत्पन्न विवाहेत्तर सम्बन्धको कथालाई पनि देखाउने प्रयास गरेको छ । फिल्ममा हिराको भूमिकामा सुरक्षाले बुलन्द अभिनय गरेकी छन् । फिल्म नै उनले बोकेकी छन् । मध्यान्तरपछि नरेन खड्काले पनि अभिनयमा आफूलाई सशक्त रुपमा प्रस्तुत गरेका छन् ।