गण्डकी प्रदेशसभा सदस्य, पूर्व मन्त्री तथा निर्माता राजिव गुरुङ (दीपक मनाङ्गे)ले पहिलो पटक फिल्ममा अभिनय गर्ने भएका छन् । अभिनेता सविन श्रेष्ठसँग मिलेर निर्माण गर्न लागेको फिल्म ‘बाघ चाल’मा मनाङ्गेले मुख्य भूमिका निभाउन लागेका हुन् । फिल्ममा उनको सकारात्मक भूमिका रहने सविनले फिल्मीखबरलाई बताए । उनी भने नकारात्मक अर्थात् भिलेनको भूमिकामा देखिनेछन् ।
दशैंअघि छायांकन पूरा गरेर यस वर्षको अन्त्यमा फिल्मलाई प्रदर्शन गर्ने तयारीमा निर्माण टिम छ । सम्राट बस्नेतको निर्देशन रहने फिल्मको कथा, पटकथा तथा संवाद शिवम् अधिकारीले लेखेका हुन् । फिल्मको ९० प्रतिशत छायांकन नेपालमा र एक गीतसहित १० प्रतिशत छायांकन अष्ट्रेलियामा हुने अभिनेता श्रेष्ठले जानकारी दिए । फिल्म एक्सन र लभस्टोरी कथामा बन्ने उनको भनाई छ ।
सविन ‘बाघ चाल’बाट आफ्नो जबर्जस्त कमब्याक हुनेमा विश्वस्त छन् । उनले भने, ‘म अहिलेसम्म एउटै खाले भूमिका र गेटअपमा प्रस्तुत भएँ । म आफैं मोनोटोनस भएको थिएँ । यसपटक अलि फरक भूमिका निभाउँदैछु । म आफैंलाई त्यो भूमिका निर्वाह गर्न चुनौती छ ।’ फिल्ममा ३ नायक र २ नायिका हुने सविनले बताए । एक नायिका भने मुम्बईमा बस्ने नेपाली मुलकी युवती हुनेछिन् ।
पहिलो पटक दीपक मनाङ्गेलाई ठूलो पर्दामा अभिनय गर्दै गरेको हेर्न दर्शकलाई रोचक हुनेछ । उनले पहिलो पटक अभिनय गर्न लागेको भए पनि फिल्म निर्माण निरन्तर गर्दै आइरहेका छन् । उनले आफ्नो छोरा सिद्धार्थ गुरुङलाई अभिनेताको रुपमा डेब्यू गराउन पहिलो पटक फिल्म ‘वन वे’ बनाएका थिए । त्यसपछि उनी ‘पोइ पर्यो काले’ र ‘दुई नम्बरी’मा निर्माताको रुपमा जोडिए ।
