आगामी जेठ १२ गतेबाट प्रदर्शनमा आउन लागेको शम्भु थापाद्वारा निर्देशित फिल्म ‘हुक्काः एन एब्सर्ड ड्रिम’को गीत ‘जाउ नआउ’ सार्वजनिक गरिएको छ । युशिन राईको स्वर तथा शब्द रचना रहेको गीतमा प्रयत्न श्रेष्ठको संगीत छ । गीतमा फिल्मका पात्रहरुको मनोदशा र मनोविज्ञानलाई देखाइएको छ । गीतमा फिल्मका केही संवादसहितका दृश्य समावेश छ । गीतको अडियो बलियो छ ।

प्रकाश घिमिरे, सन्तोषकुमार आत्रेय, प्रमिला खनाल, तेज गिरी, अशु न्यौपाने, तलिसा गुरुङ, निश्चल विमल आदि कलाकारहरुको अभिनय रहेको फिल्ममा कलाकार आत्रेयको कथा तथा आत्रेय र भगवान पौडेलको पटकथा छ । रेश्मा प्रधान सह-निर्माता, पार्वती थापा, सुशीला गुरुङ र सागर गोदार क्षेत्री निर्माता, कमलबहादुर भुजेल र किरणकुमार आत्रेय फिल्मका कार्यकारी निर्माता हुन् ।

स्टेसन फाइभ र एफडी कम्पनीले फिल्मको वितरण अधिकार लिएका छन् । अभिनेत्री प्रमिला खनालले फिल्मले लोकल चामलको स्वाद दिने दाबी गरेकी छन् । त्यस्तै, अभिनेता तेज गिरी फिल्ममा आफ्नो चरित्र कथामा ट्वीस्ट ल्याउने खालको रहेको बताएका छन् । फिल्ममा महिला चरित्र हिरो रहेको उनको भनाई छ । पारिवारिक घटनाक्रमलाई मियो बनाएर फिल्मले कथावाचन गरेको छ ।