असार २१ गते घरमा मृत अवस्थामा भेटिएका अभिनेता सारुक ताम्राकारको आत्महत्या प्रकरणले ठूलो हलचल ल्याउने देखिएको छ । केही दिनदेखि कलाकारहरुले उनको न्यायका लागि आवाज उठाइरहेका छन् भने शनिबार सारुकले निधनअघि अभिनय गरिरहेको फिल्म ‘ह्यासट्याग माया’का निर्देशक राजिव गुरुङले केही कुरा खुलासा गरेपछि एकखालको खैलाबैला मच्चिएको छ ।

निर्देशक गुरुङको अन्तर्वार्तापछि अभिनेत्री प्रियंका कार्कीले इन्स्टाग्राममार्फत् सारुकको आत्महत्याको विषयमा गहिरो अनुसन्धान आवश्यक रहेको बताएकी छन् । उनले लेखेकी छन्, ‘कुनै प्रेरक शक्ति र प्रभावका कारण घटना घटेको हो भने गहन छानबिनको आवश्यक छ ।’ अभिनेत्री रेखा थापाले एक पत्रकारको फेसबुक पोस्टमा कमेन्ट गर्दै सारुकले न्याय पाउनुपर्ने उल्लेख गरेकी छन् ।

त्यस्तै, कलाकार निर्मल शर्माले सारुक ताम्राकारको आत्महत्यापछि आएका विभिन्न अड्कलहरुको छानबिन गर्न कलाकार संघले प्रहरीसँग समन्वय गरी सत्यतथ्य बाहिर ल्याउनु पर्ने बताएका छन् । अभिनेता कृष्ण मल्लले सारुकको आत्महत्याको बारेमा धेरै विवादास्पद समाचार तथा कुराहरु आइसकेकाले कुनै पनि तहबाट अनुसन्धान हुन जरुरी रहेको फेसबुकमा उल्लेख गरेका छन् ।

सारुकको परिवारबाट अहिलेसम्म कुनै जाहेरी नपरेकाले प्रहरीले पनि खासै गम्भीरसँग घटनाको छानबिन गरिरहेको छैन । प्राप्त जानकारी अनुसार, अहिले सारुकको मोबाइल फरेन्सी ल्याबमा पठाइएको छ । उनको आत्महत्याको विषयमा उचित छानबिनको आवाज उठिरहँदा कलाकारको हकहितका लागि गठन भएको चलचित्र कलाकार संघ भने कानमा तेल हालेर बसेको अवस्था छ ।