दीपकराज गिरी र दीपाश्री निरौलाको क्याम्पबाट बाहिर रहेर दोस्रोपटक अभिनेता केदार घिमिरेले फिल्ममा काम गर्ने भएका छन् । यसअघि सुदर्शन थापा निर्देशित फिल्म ‘रामकहानी’मा काम गरेका उनी अब ‘कङ्गारु’मा जोडिएका छन् । सोमबार निर्माता र कलाकार घिमिरेबीच कागजी सम्झौता भएको छ । फिल्ममा अनुबन्धित भएपछि केदारले आफू काम गर्न उत्साहित रहेको बताए ।

सम्राट बस्नेतको निर्देशन रहने फिल्ममा गण्डकी प्रदेशका सांसद् तथा पूर्व मन्त्री राजीव गुरुङ (दीपक मनाङ्गे)को लगानी रहनेछ । कमेडी, थ्रीलर तथा सस्पेन्स जनरामा बन्न लागेको फिल्मको निर्मातामा प्रेम थापा, धन बहादुर गुरुङ र लक्ष्मी राई छन् । फुलमुन मोसन पिक्चर्स, लक्ष्मी ज्वेलर्स (युके) र उत्तरगया म्युजिक एण्ड फिल्मसँग आस्याप इन्टरटेन्मेन्टले निर्माणमा सहकार्य गरेको छ ।

‘कङ्गारु’को सह-निर्मातामा रोनिश बहादुर बस्नेत र निशान श्रेष्ठ छन् भने टीका भण्डारी र सन्तोष अधिकारी (अष्ट्रेलिया) कार्यकारी निर्मातामा छन् । फिल्मको लाइन प्रोड्यूसर आस्याप इन्टरटेन्मेन्ट (अष्ट्रेलिया) हो । सीमा गुरुङको कथा र महेश दवाडीको पटकथा रहेको फिल्मका प्रोडक्सन डिजाइनर दीलिप पन्त हुन् । निर्देशक बस्नेतले फिल्ममा केही फरक कथा भन्न खोजेको बताएका छन् ।