गत वर्ष (२०२३) ‘पठान’ जस्तो ब्लकबस्टर फिल्म दिएका निर्देशक सिद्धार्थ आनन्दले अभिनेता ऋतिक रोशन र अभिनेत्री दीपिका पादुकोणलाई लिएर बनाएको फिल्म ‘फाइटर’ बक्स अफिसमा दम तोड्ने अवस्थामा पुगेको छ । २४ करोडको ओपनिङ गरेको फिल्मलाई घरेलू बजारबाटै लगानी सुरक्षित गर्न चुनौती देखिएको छ । यो फिल्म २ सय ५० करोडको लागतमा निर्माण भएको हो ।
विकेन्ड अर्थात् तीन दिनमा ९३ करोड ४० लाख कमाएपछि फिल्मको व्यापारमा ठूलो गिरावट आएको छ । दोस्रो हप्ताको शुक्रबार र शनिबार व्यापारमा केही सुधार देखिए पनि आइतबारबाट फेरि खस्कियो । फिल्मले १२औं दिनसम्ममा भारतीय बजारबाट १ सय ७८ करोड ६० लाख कमाएको इन्डिया टाइम्सले उल्लेख गरेको छ । फिल्मको विश्वव्यापी कलेक्सन भने ३ सय करोड नाघेको छ ।
इन्डिया टाइम्सका अनुसार, सोमबारबाट भारतमा फिल्मको अकुपेन्सी १० प्रतिशतभन्दा तल देखिएको छ । र, व्यापार ३ करोडमा झरेको छ । जसले गर्दा अब फिल्मलाई २ सय करोडको आँकडा पनि टाढा बनेको छ । फिल्मले घरेलु बजारबाटै लगानी उठाउन झण्डै ३ सय करोड कमाई गर्नुपर्ने ट्रेड एनालिस्टहरुको तर्क छ । फिल्मको गिर्दो व्यापार हेर्दा यो अंक अब असम्भव नै देखिन्छ ।
‘फाइटर’ व्यापारिक हिसाबमा अब्बल बन्न चुकेको भए पनि समीक्षा अब्बल मिलेको छ । बलिउडमा पहिलोपटक एरियल एक्सन फिल्म बनेको हो । फिल्मको एरियल एक्सनको दृश्य, छायांकन, सम्पादन, अभिनय, निर्देशन पक्षको जबर्जस्त प्रशंसा भएको छ । तर, ‘फाइटर’को बक्स अफिस अंकले बलिउडलाई ठूलो झट्का लागेको छ । नेपालका वितरकलाई समेत फिल्मले डुबाएको छ ।
