बुद्ध जयन्तीको विदा पारेर बिहीबारदेखि प्रदर्शनमा आएको फिल्म ‘पूजार सार्की’ले घरेलु बक्स अफिसमा सानदार ओपनिङ गरेको छ । फिल्मलाई देशभरका हलमा दर्शकको उत्साहजनक साथ देखियो । बिहान ४०/५० प्रतिशत हाराहारी अकुपेन्सी कायम गरेको फिल्मले मध्यान्हबाट दर्शकको चाप बढाएको थियो । दिउँसो र रात्रिकालिन प्रायः शोजमा फिल्मको शतप्रतिशत अकुपेन्सी रह्यो ।

देशको सबैभन्दा ठूलो मल्टीप्लेक्स चेन क्यूएफएक्सको काठमाडौंसहित मोफसल अन्तर्गत दमौली, विराटनगर, इटहरी, नेपालगञ्ज, नारायणगढ, विर्तामोडका हलमा फिल्मलाई प्राप्त शोजमा उल्लेख्य मात्रामा दर्शकको उपस्थिति देखिएको थियो । काठमाडौंका बिग मुभिज, वान् सिनेमाज्, एफक्युब, बिएसआर जस्ता ठूला मल्टीप्लेक्समा पनि फिल्मले बिहीबार आकर्षक व्यापार गरेको छ ।

सिंगल थिएटरहरुमा समेत फिल्म हेर्ने दर्शकको चाप उच्च थियो । बालाजुस्थित अष्टनारायण हलको मध्यान्ह साढे ४ बजेको शोजमा तीनवटा हल हाउसफुल भएका थिए । जसमा एक हजारभन्दा बढी दर्शकको उपस्थिति थियो । त्यहाँका दर्शकहरुसँग साक्षात्कार गर्न फिल्मका तीन ‘स्टार’हरु आर्यन सिग्देल, प्रदीप खड्का र पल शाह एकसाथ अष्टनारायण पुग्दा अद्भूत क्रेज देखिएको थियो ।

फिल्मका कलाकारहरुले बिहानैदेखि काठमाडौंका विभिन्न हलहरु पुगेर दर्शकसँग भेट गरेका थिए । आर्यन, प्रदीप र पल एकसाथ हलमा पुग्दा दर्शकको भीड नियन्त्रण गर्नै निर्माण टिमलाई हम्मेहम्मे परेको हुन्थ्यो । उनीहरुसँग तस्वीर खिच्न चलेको हानाथाप उस्तै थियो । यसले एकपटक फेरि उनीहरुको स्टारडम प्रमाणित गरेको छ । तीनै स्टारको अभिनयलाई पनि दर्शकले मनपराएका छन् ।

फिल्मको रिलिजकै लागि ‘रावायण’को छायांकन रोकेर बिहीबार बिहान सर्लाहीबाट काठमाडौंमा आइपुगेका पल दर्शकको साथले बेग्लै रमाइलो महसुस भएको अनुभव सुनाए । ‘मैले २ वर्षपछि दर्शकसँग बसेर यसरी फिल्म हेरेको हुँ । र, दर्शकले यो किसिमले साथ दिएको देख्दा रमाइलो र खुसी महसुस भइरहेको छ । दर्शकले प्रतिक्रिया पनि एकदमै राम्रो दिइरहनुभएको छ,‘ उनले भने ।

प्रदीपले फिल्मबाट दर्शक सन्तुष्ट भएको देख्दा आनन्द लागेको बताए । उनले भनेका छन्, ‘फिल्म हेरेर दर्शक सन्तुष्ट देखिनुभएको छ । त्यो नै हाम्रो सफलता हो । हामी जे कुरामा कन्भिन्स्ड थियौं, त्यो कुरा जस्ताको त्यस्तै आएको छ । अब यसले लामो समयसम्म आफ्नो प्रभाव छाड्छ भन्नेमा म विश्वस्त छु ।’ आर्यनले भने दर्शकले दिएको साथलाई फिल्मको सफलताको सुरुवात मानेका छन् ।

फिल्मका वितरक रोहित कट्टेलले बिहीबारको व्यापार एकदमै राम्रो भएको दाबी गरे । उनले भने, ‘आज हामीले सोचेकोभन्दा पनि राम्रो व्यापार भयो । देशभर फिल्मलाई प्राप्त शोजहरु प्रायः सबै हाउसफुल भए । फिल्मप्रति दर्शकको क्रेज हेर्दा आगामी दिनमा पनि आक्रामक व्यापार यथावत् रहनेमा विश्वस्त छौं ।’ फिल्मको बिहीबारको कलेक्सन एक करोडमाथि हुने आँकलन गरिएको छ ।

जातीय विभेदविरुद्धको कथामा आधारित भएर बनेको फिल्मलाई दर्शकहरुबाट बलियो ‘वर्ड अफ माउथ’ मिलेको छ । विशेषगरी फिल्मको पहिलो हाफ र क्लाइमेक्सलाई दर्शकले बुलन्द भनेका छन् । अब यसको प्रभाव फिल्मको आगामी दिनको व्यापारमा पर्ने आँकलन गरिएको छ । दिनेश राउतको निर्देशनमा तयार भएको फिल्ममा अञ्जना बराइली र परीक्षा लिम्बूको मुख्य भूमिका छ ।