फिल्म ‘रणवीर’बाट डेब्यु गरेकी अभिनेत्री सुपुष्पा भट्ट पछिल्लो फिल्म ‘फेरि रेशम फिलिली’सम्म आइपुग्दा ‘लभर गर्ल’को भूमिकामा बढी देखिइन् । तर, यही चैत २९ गतेबाट प्रदर्शन हुन लागेको फिल्म ‘पिताम्बर’मा भने उनी फरक भूमिकामा छिन् । यसमा उनले विधवा महिलाको भूमिका निभाएकी छन् । उनी आफूले खोजेको जस्तो भूमिकामा काम गर्न पाएकोमा खुसी छिन् ।
‘मैले गर्न खोजेको क्यारेक्टर ‘पिताम्बर’मा छ,’ सुपुष्पा आफ्नो भूमिकाबारे भन्छिन्, ‘विहानी विधवा छे र ‘इनोनसेन्ट’ छे । विहानी कसरी विधवा हुन्छे भन्ने थाहा पाउन फिल्म नै हेर्नुपर्छ । यो क्यारेक्टरमा फेज र ग्राफ छ । कहाँदेखि कहाँसम्म के भइरहेको छ भन्ने विहानीमार्फत थाहा पाइन्छ ।’
‘पिताम्बर’मा काम गरेपछि सुपुष्पाले के बुझेकी छन् भने नेपाली समाजमा विधवाको जीवन बाँच्न सहज छैन । उनी भन्छिन्, ‘नेपाली समाजमा बसिसकेपछि विधवाको जीवन बाँच्न गाह्रो हुँदोरहेछ । आफूलाई माया गर्ने मान्छे नै नहुँदा गाह्रो पक्कै हुन्छ । यो फिल्ममा काम गरेपछि मैले धेरै कुरा बुझें । अहिले त महिलाहरुले आफ्नो ‘स्ट्याण्ड’ लिनुहुन्छ । उहाँहरु अगाडि पनि आइरहनुभएको छ ।’
उनलाई ‘पिताम्बर’मा अभिनयको प्रस्ताव निर्देशकले भन्दा पनि छायाँकार तथा सह-निर्माता पुरुषोत्तम प्रधानले गरेका रहेछन् । ‘वानलाइन स्टोरी’ र क्यारेक्टरले आकर्षित गरेपछि उनले फिल्म उम्काउन चाहिनन् । ‘यो फिल्ममा काम गर्छु भनेर पहिला कुनै योजना थिएन । स्क्रिप्ट सुनेपछि नाइँ भन्न सकिनँ । ‘वानलाइन स्टोरी’ र क्यारेक्टरले नै मलाई तान्यो’, उनी भन्छिन् ।
‘पिताम्बर’मा जोडिन पाएकोमा आफूलाई भाग्यमानी ठान्ने सुपुष्पालाई आफ्नो पात्रमा काम गर्न सक्ने हो कि होइन भन्ने कुराले चाहिँ डर लागेको रहेछ । फिल्ममा एकसेएक कलाकार भएकाले आफू कतै चिप्लिने हो कि भन्ने चिन्ता पनि भएको उनी सम्झन्छिन् । भन्छिन्, ‘फिल्ममा सबै कलाकार राम्रो अभिनय गर्ने हुनुहुन्छ । मेरो अभिनय चाहिँ कताबाट चिप्लिने हो कि भन्ने डर थियो । आफू तयारी अवस्थामा रहेपछि त्यो डर हराउँदो रहेछ ।’
‘रणवीर’पछि उनले काम गरेको दोस्रो एक्सन फिल्म हो ‘पिताम्बर’ । तर, दुवैमा उनको एक्सन छैन । अब भने उनलाई आफैं एक्सन भूमिकामा देखिने इच्छा जागेको छ । भन्छिन्, ‘अब मलाई एक्सन फिल्ममा आफैंले एक्सन गर्न मन छ । यो पहिलोदेखिकै इच्छा हो । ‘पिताम्बर’ गरेपछि अझ इच्छा जागेको छ । त्यस्तो फिल्मबाट अफर आयो भने स्क्रिप्ट र क्यारेक्टर हेरेर निर्णय लिन्छु ।’
